Экономикалық, әлеуметтiк және мәдени құқықтар туралы
халықаралық Пактi
(Нью-Йорк, 1966 ж. 19 желтоқсан)
2005 ж. 21 қарашадағы 87-III ҚР Заңымен ратификацияланды
Осы Пактіге қатысушы мемлекеттер,
Бiрiккен Ұлттар Ұйымының Жарғысында жарияланған қағидаттарға сәйкес, адам баласы отбасының барлық мүшелерiне тән қадiр-қасиетін, олардың құқықтарының теңдiгi мен ажырамастығын тану-бостандықтың, әдiлдiктiң және жалпыға бірдей бейбiтшiлiктiң негiзi болып табылатынын назарға ала отырып,
бұл құқықтар адам баласына тән қадiр-қасиеттен туындайтындығын тани отырып,
Адам құқықтарының жалпыға бірдей декларациясына сәйкес әркiм экономикалық, әлеуметтiк және мәдени құқықтарын да өзiнiң азаматтық және саяси құқықтарымен бірдей пайдалана алатындай жағдай туғызғанда ғана, үрей мен мұқтаждықтан бостандығын иеленген еркiн адам үлгісi жүзеге асырылуы мүмкiн екендiгiн тани отырып,
Бiрiккен Ұлттар Ұйымының Жарғысы бойынша мемлекеттер адам құқықтары мен бостандықтары жалпыға бірдей құрметтелуiн және сақталуын көтермелеп отыруға мiндетті екендiктеріне назар аудара отырып,
әрбір жеке адам, басқа адамдарға және өзi мүшесi болып саналатын ұжымға қатысты мiндеттерi бола отырып, осы Пактіде танылған құқықтарды көтермелеуге және сақтауға қол жеткізуi тиiс екендiгiне назар аудара отырып, төмендегi баптар туралы келiсті:
I Бөлiм
1-бап
1. Барлық халықтар өзiнiң мемлекеттік құрылысын өздерi шешуге құқылы. Осы құқық бойынша олар өз елiнiң саяси мәртебесiн еркiн белгілеп, оның экономикалық, әлеуметтiк және мәдени дамуын еркiн түрде қамтамасыз етеді.
