Жоба
Қазақстан Республикасының Заңы
«Қазақстан Республикасының кейбір заңнама актілерiне
Қазақстан Республикасында жер қойнауын пайдалану және
мұнай операцияларын жүргiзу мәселелерi бойынша
өзгерістер мен толықтырулар енгізу туралы»
ҚР Үкіметінің 2005.08.09. № 902 Қаулысымен ҚР Парламентi Мәжілісiнiң қарауына енгiзiлді
1-бап. Қазақстан Республикасының мына заңнама актілерiне өзгерістер мен толықтырулар енгiзілсiн:
1. "Мұнай туралы" Қазақстан Республикасының 1995 жылғы 28 маусымдағы Заңына (Қазақстан Республикасы Жоғарғы Кеңесiнiң Жаршысы, 1995 ж., № 11, 76-құжат; Қазақстан Республикасы Парламентiнiң Жаршысы, 1997 ж., № 11, 150-құжат; 1999 ж., № 21, 787-құжат; 2003 ж., № 6, 34-құжат; № 11, 56-құжат; 2004 ж., № 22, 131-құжат; 2004 ж., № 23, 142-құжат):
1) 1-баптың 36) тармақшасы мынадай редакцияда жазылсын:
"36) жер қойнауын зерттеу және пайдалану жөніндегі уәкiлеттi орган - геологиялық зерттеу, жер қойнауын ұтымды әрi кешендi пайдалану саласындағы мемлекеттік реттеудi жүзеге асыратын мемлекеттік орган;";
2) 6-баптың 1-тармағында 7-4) тармақша алынып тасталсын;
мынадай мазмұндағы 10-1) тармақшамен толықтырылсын:
"10-1) мұнай-газ саласындағы нормативтік-техникалық құжаттарды әзiрлеу және бекіту.";
3) мынадай мазмұндағы 6-1 және 6-2-баптармен толықтырылсын:
"6-1-бап. Жер қойнауын зерттеу және пайдалану жөніндегі
уәкілетті органның құзыретi
1. Жер қойнауын зерттеу және пайдалану жөніндегі уәкiлетті органның құзыретiне:
1) келісім-шарттық аумақты қайтаруға байланысты ресiмделетiн геологиялық және тау бөлiнiстерiн дайындау және беру;
2) барлауды немесе өндiрудi жүзеге асыру жұмыстарының бағдарламасын келiсу;
3) осындай бағдарламалар бекітілген күннен бастап екi апта мерзiмде жылдық жұмыс бағдарламаларының келiсу хаттамаларының көшiрмелерiн құзыреттi органға ұсыну;
4) жылдық жұмыс бағдарламасына мердiгер ұсынған өзгерістердi келiсу;
5) қоршаған ортаны қорғау саласындағы уәкiлеттi органның мемлекеттік экологиялық сараптамасының оң қорытындысы болған кезде жылдық жұмыс бағдарламаларын келiсу кiредi.
