Қазақстан Республикасы мен Польша Республикасы арасындағы
КОНСУЛДЫҚ КОНВЕНЦИЯ
(Варшава қ. 1997 ж. 27 қараша)
2006 жылғы 4 шілдедегі № 155-III ҚР Заңымен ратификацияланды
Қазақстан Республикасы мен Поляк Республикасы,
достықты нығайтуға және өзара тиімді ынтымақтастықты тереңдетуге ерік білдіре отырып,
екі мемлекет арасындағы консулдық қатынастарды реттеу және дамыту тілегін басшылыққа ала отырып,
1963 жылғы 24 сәуірдегі Венада қол қойылған Консулдық қатынастар жөніндегі Вена конвенциясының ережелері осы Конвенцияда егжей-тегжейлі көрініс таппаған мәселелерде қолданылатынын растай отырып,
осы Консулдық конвенцияны жасасуды ұйғарды және төмендегілер туралы уағдаласты:
I бөлім
Анықтамалар
1-бап
1. Осы Конвенцияда пайдаланылатын анықтамалардың төмендегідей мағыналары бар:
а) "консулдық мекеме" - кез келген бас консулдықты, консулдықты, вице-консулдықты және консулдық агенттікті білдіреді;
b) "консулдық округ" - консулдық қызметті орындау үшін консулдық мекемеге бөлініп берілген ауданды білдіреді;
с) "консулдық мекеме басшысы" - осы сапада іс-әрекет жасау тапсырылған адамды білдіреді;
d) "консулдық лауазымды адам" - консулдық мекеменің басшысын қоса алғанда, осы сапада консулдық қызметтерді орындау тапсырылған кез келген адамды білдіреді;
е) "консулдық мекеме қызметкері" - консулдық мекемеде әкімшілік және техникалық міндеттерді орындайтын кез келген адамды, білдіреді;
f) "қызмет көрсетуші персонал қызметшісі" - консулдық мекемеге қызмет көрсету жөніндегі міндеттерді орындайтын кез келген адамды білдіреді;
g) "консулдық мекеменің қызметкері" - консулдық лауазымды адамды, консулдық мекеме қызметкерін және қызмет көрсетуші персоналдың қызметшісін білдіреді;
h) "жеке үй қызметшісі" - консулдық мекеме қызметкерінің жеке үй қызметінде ғана тұрған адамды білдіреді;
і) "отбасы мүшесі" - консулдық мекеме қызметкерінің жұбайын (зайыбын), балаларын және, егер олар онымен бірге тұрып жатса және оның асырауында болса, оның ата-аналарын білдіреді;
