Жоба
2003 жылғы 19 қыркүйектегі Біртұтас экономикалық кеңістік құру туралы
келісімге қатысушы мемлекеттердің кеден органдары арасындағы тауарлар
мен көлік құралдарын өткізу туралы ақпарат алмасуды ұйымдастыру туралы келісім
ҚР Үкіметінің 2006 жылғы 13 маусымдағы № 545 Қаулысымен жобасы мақұлданды
Бұдан әрі Тараптар деп аталатын 2003 жылғы 19 қыркүйектегі Біртұтас экономикалық кеңістік құру туралы келісімге қатысушы мемлекеттердің үкіметтерi
Тараптар мемлекеттерінің кедендік шекаралары арқылы өткізілетін тауарлар мен көлік құралдарын тиімді кедендік бақылауды қамтамасыз етуге ұмтыла отырып,
Тараптар мемлекеттерінің кедендік шекаралары арқылы тауарлар мен көлік құралдарын өткізу рәсімдерін жеделдету мен оңайлатуға, заңсыз өткізудің алдын алуға және Тараптар мемлекеттерінің экономикалық мүдделерін қорғау мақсатында тауарлар мен көлік құралдарын тасымалдаудың қауіпсіздігін қамтамасыз етуге ниет ете отырып,
ақпарат өңдеудің қазіргі заманғы тәсілдерін пайдалану мен ақпараттық және коммуникациялық технологияларды қолдану аясын кеңейтуге осы мақсаттарда шаралар қабылдай отырып,
мына төмендегілер туралы келісті:
1-бап
Тараптар мемлекеттерінің кеден органдары БЭК құруға бағытталған халықаралық шарттарға, Тараптар мемлекеттерінің заңнамаларына және осы Келісімге сәйкес өз құзыреттерінің шеңберінде кедендік ресімдеу мен кедендік бақылауды жетілдіру, Тараптар мемлекеттерінің кедендік шекаралары арқылы тауарлар мен көлік құралдарын өткізу туралы ақпарат алмасуды ұйымдастыру жөніндегі шараларды қабылдайды.
Тараптар мемлекеттерінің кеден органдары арасындағы ақпарат алмасу екі жақты және/немесе көп жақты негізде жүзеге асырылуы мүмкін.
2-бап
Тараптар мемлекеттерінің кеден органдары осы Келісімнің негізінде ақпарат алмасуды ұйымдастырудың техникалық жағдайларын әзірлеу басталғанға дейін мыналарды:
ақпараттың құрамын;
алмасуға қатысушыларды;
ақпараттық өзара іс-қимыл деңгейлерін;
техникалық іске асыру үшін жауаптыларды;
басқа да мәліметтерді әзірлейді және келіседі.
