Оңтүстік Қазақстан облыстық сотының топ болып адам өлтіргендер жөніндегі үкімін өзгеріссіз қалдыру туралы
Қазақстан Республикасы Жоғарғы Сотының қылмыстық істер жөніндегі алқасының
2008 жылғы 12 қарашадағы № 2а-333-08 Қаулысынан үзінді
Қазақстан Республикасы Жоғарғы Сотының қылмыстық істер жөніндегі алқасы төрағаның, алқа мүшелері — судьялардың, Қазақстан Республикасы Бас прокурорының көмекшісінің қатысуымен өткен ашық сот мәжілісінде Оңтүстік Қазақстан облыстық сотының 2008 жылғы 10 қыркүйектегі үкіміне адвокаттың келтірген апелляциялық шағымымен түскен қылмыстық істі қарады.
Аталған үкіммен
А. 1983 жылы Оңтүстік Қазақстан облысы Мақтаарал ауданында туған, қазақ, бұрын сотталмаған, бойдақ,
- ҚК-нің 96-бабы 2-бөлігінің «ж» тармағымен 15 жылға бас бостандығынан айыруға, жазасының мерзімі 2008 жылғы 13 мамырдан бастап есептеліп, қатаң режимдегі түзеу колониясында өтеуге сотталған.
Іске тіркелген айғақты заттар туралы мәселе ҚІЖК-нің 121-бабына сәйкес шешілген.
Сондай-ақ, осы үкіммен Н. да ҚК-нің 96-бабы 2-бөлігінің «ж» тармағымен 15 жылға бас бостандығынан айыруға сотталып, оның немесе прокурор мен жәбірленушінің тарапынан үкімге апелляциялық шағымдар, наразылық келтірілмеген.
Үкім бойынша А. 2008 жылы мамыр айының 9-на қараған түнінде Мақтаарал ауданы Жайлы-баев елді мекенінде арақ ішкен мас күйінде Н.-мен бірігіп, топ болып өздерімен бірге арақ ішкен К.-ні бас араздықтың салдарынан қолдарымен ұрып, аяқтарымен тепкілеп, қасақана өлтіргені үшін айыпталған.
Апелляциялық шағымында адвокат А.: «Сотталушы А. сот мәжілісінде Н. екеуінің арасында жәбірленушіні өлтіру туралы келісім болмағанын, Н. оқиға болған жерге кейін келгенін айтты», — деп жазып, А.-ның әрекетін ҚК-нің 96-бабының 1-бөлігіне қайта дәрежелеп, осы бапта көзделген жазаның ең төменгі мөлшерін қолдануды сұраған.
