«Smart Data Ukimet» ақпараттық-талдау жүйесі арқылы әлеуметтік-еңбек саласының кейбір мемлекеттік қызметтерін проактивті көрсету жөніндегі пилоттық жобаны іске қосу туралы
Қазақстан Республикасы Цифрлық даму, инновациялар және аэроғарыш өнеркәсібі министрінің 2023 жылғы 3 қазандағы № 458/НҚ және Қазақстан Республикасы Еңбек және халықты әлеуметтік қорғау министрінің бірлескен бұйрығы
6-тармаққа сәйкес қолданысын тоқтатты
«Мемлекеттік көрсетілетін қызметтер туралы» Қазақстан Республикасы Заңының 22-бабына сәйкес БҰЙЫРАМЫЗ:
1. «Smart Data Ukimet» ақпараттық-талдау жүйесі арқылы әлеуметтік-еңбек саласының кейбір мемлекеттік қызметтерін проактивті көрсету жөніндегі пилоттық жоба іске қосылсын.
2. Осы бірлескен бұйрыққа қосымшаға сәйкес «Smart Data Ukimet» ақпараттық-талдау жүйесінде және «Е-макет» автоматтандырылған ақпараттық жүйесінде проактивті нысанда отбасылардың әл-ауқатын мониторингтеу нәтижелері бойынша анықталған алушыларға әлеуметтік-еңбек саласының кейбір мемлекеттік қызметтерін көрсету жөніндегі пилоттық жобаны іске асыру кезінде мемлекеттік органдардың өзара іс-қимыл алгоритмі бекітілсін.
3. «Ұлттық ақпараттық технологиялар» акционерлік қоғамы «Smart Data Ukimet» ақпараттық-талдамалық жүйесі арқылы әлеуметтік-еңбек саласының мемлекеттік қызметтерін әлеуетті алушылардың тізімдерін тұлғасыз түрде сегменттеп және қалыптастырсын.
4. Қазақстан Республикасының Еңбек және халықты әлеуметтік қорғау министрлігінің Цифрландыру және мемлекеттік қызметтерді автоматтандыру департаменті және Қазақстан Республикасының Цифрлық даму, инновациялар және аэроғарыш өнеркәсібі министрлігінің Цифрлық трансформация департаменті осы бірлескен бұйрықты өзінің аумақтық органдарының, ведомстволарының, олардың аумақтық бөлімшелерінің және ведомстволық бағынысты ұйымдарының назарына жеткізсін.
