Осы редакция 2015 жылғы 17 наурызда енгізілген өзгерістеріне дейін қолданылды
Қазақстан Республикасы
Әділет министрінің м.а.
2010 жылғы 23 сәуірдегі
№ 136 бұйрығына
6-қосымша
Қазақстан Республикасында Тауар таңбасын
(қызмет көрсету таңбасын) жалпыға мәлім деп тану жөніндегі
ереже
1. Жалпы ережелер
1. Осы Ереже «Тауар таңбалары, қызмет көрсету таңбалары және тауарлар шығарылған жерлердің атаулары туралы» 1999 жылғы 26 шілдедегі Қазақстан Республикасының Заңы (бұдан әрі - Заң) 3-бабының 2-тармағы 2-1) тармақшасына сәйкес әзірленді және Өнеркәсіптік меншікті қорғау жөніндегі 1883 жылғы 20 наурыздағы Париж конвенциясының (бұдан әрі - Париж конвенциясы) 6 bis және 10 bis баптарына орай Қазақстан Республикасында тауар таңбасын, қызмет көрсету таңбасын (бұдан әрі - тауар таңбасы) жалпыға мәлім деп танудың тәртібін белгілейді.
2. Осы Ереженің мақсаттары үшін Қазақстан Республикасының аумағында тіркелген немесе таңбаларды халықаралық тіркеу туралы Мадрид келісіміне орай қорғалатын тауар таңбасы, сондай-ақ Қазақстан Республикасында тауар таңбасы ретінде құқықтық қорғаусыз пайдаланылатын, бірақ белсенді пайдаланылуы нәтижесінде Қазақстан Республикасында халықтың тиісті топтары арасында кең мәлім болған белгі жалпыға мәлім тауар таңбасы деп танылуы мүмкін.
3. Қазақстан Республикасы Әділет министрлігінің Зияткерлік меншік құқығы жөніндегі комитеті (бұдан әрі - уәкілетті орган) тауар таңбасын жалпыға мәлім деп тану жөніндегі уәкілетті орган болып табылады.
2. Тауар таңбасын жалпыға мәлім деп тану туралы өтінім
4. Жеке тұлға немесе заңды тұлғаның өтініші бойынша Қазақстан Республикасында жалпыға мәлім тауар таңбасы деп Қазақстан Республикасы аумағында тіркелген немесе халықаралық келісімдерге сәйкес қорғалатын, сондай-ақ Қазақстан Республикасында құқықтық қорғаусыз тауар таңбасы ретінде пайдаланылатын, бірақ осы тұлғаның белсенді пайдалану нәтижесінде Қазақстан Республикасында кең танымалдыққа ие болған белгілер танылады.
