Бірінші, апелляциялық, кассациялық және қадағалау сатыларындағы соттарда қылмыстық істер бойынша сот актілерінің және мемлекет мүддесіне өкілдік етудің заңдылығына прокурорлық қадағалауды ұйымдастыру туралы
Қазақстан Республикасының Бас Прокурорының 2015 жылғы 5 қаңтардағы № 1 бұйрығы
Осы редакция 2016 жылғы 1 ақпанда енгізілген өзгерістеріне дейін қолданылды
Бірінші, апелляциялық, кассациялық және қадағалау сатыларындағы соттарда прокурорлардың өкілеттіктерді тиісінше іске асыруын қамтамасыз ету мақсатында «Прокуратура туралы» Қазақстан Республикасы Заңының 11-бабының 4) тармақшасын басшылыққа алып, БҰЙЫРАМЫН:
1. Бас әскери прокурор, Бас көлік прокуроры, облыстардың, Астана, Алматы қалаларының, қалалық және аудандық, әскери және өзге де мамандандырылған прокурорлар мемлекеттік айыптауды қылмысқа қарсы күрестің пәрменді құралдарының бірі ретінде қолдау жөніндегі жұмыстарды ұдайы жетілдірсін.
2. Прокурорлардың көпшілік және жеке-көпшілік айыптаудағы барлық қылмыстық істердің сот талқылауына, сондай-ақ ҚПК-тің 32-бабының 4-бөлігіндегі тәртіппен сотқа дейінгі тергеп-тексеру басталған істерді қарауға қатысуы қамтамасыз етілсін.
Қалалық, аудандық прокуратуралардың қызметкерлері, сондай-ақ процесс прокурорлары бірінші сатыдағы соттардың отырыстарына қатысады. Күрделі және көп эпизодты істер бойынша мемлекеттік айыптауды бірнеше прокурорлар қолдауы мүмкін.
Бас Прокурор және оның орынбасарлары бекіткен айыптау актісі бар қылмыстық істер бойынша мемлекеттік айыптаушылар, процесс прокуроры тағайындалған істерді қоспағанда, Бас прокуратура басшылығының келісімі бойынша тағайындалады.
