2004 жылы 23 желтоқсанда «Қазақстан Республикасындағы еңбек туралы» заңға енгізілген өзгерістер мен толықтырулар туралы» заң қабылданды. Енгізілген өзгерістер мен толықтырулар негізінен жас баласы бар әйел адамдарды әлеуметтік қорғау мен қызметкерлерді қолдауға бағытталған.
ЕҢБЕК ҚАТЫНАСЫНДАҒЫ ӨЗГЕРІСТЕР
Заң қызметкер мен жұмыс берушінің құқықтары мен міндеттері, жеке еңбек шартының мерзімі, жеке еңбек шартын бұзудың негіздері, ұжымдық шарт түсінігі, жас баланы күтуге берілетін қосымша демалыс мәселелерін нақтылады. Енгізілген толықтыруларға сәйкес:
- қызметкер міндетті зейнетақы жарналары есебінен зейнетақымен қамсыздандыру туралы шарттың көшірмесін ұсынуға;
- зейнетақы жинақтарын бір жинақтаушы зейнетақы қорынан басқасына аударған кезде міндетті зейнетақы жарналары есебінен қамсыздандыру туралы жинақтаушы зейнетақы қорымен шарт жасасқаны жөнінде жұмыс берушіні хабардар етуге міндетті.
Жұмыс берушінің қатарына:
- жұмыс орындары мен технологиялық процестерде қатердің алдын алу жөнінде шаралар қолдануға, өндірістік және ғылыми-техникалық прогресті ескере отырып, профилактикалық жұмыстарды жүргізу;
- жұмыс уақытының, соның ішінде жұмыс уақытынан тыс істеген жұмыс, әрбір қызметкердің зиянды (өте зиянды), қауіпті (өте қауіпті) еңбек жағдайларында, ауыр дене еңбегімен айналысатын жұмыс уақытының нақты есебін жүргізу міндеттері қосылды.
