Қазақстан Республикасы
Қаржы министрлігінің
Салық комитеті Төрағасының
2005 жылғы 12 желтоқсандағы
№ 554 бұйрығымен бекітілген
Бірыңғай жер және әлеуметтік салықтар
бойынша декларация жасау ережелері
(920.00 нысан)
1. Жалпы ережелер
1. Осы Ережелер “Салық және бюджетке төленетін басқа да міндетті төлемдер туралы” Қазақстан Республикасының Кодексіне (Салық кодексі) сәйкес әзірленген және қоса берілген нысандарды (бұдан әрі - нысандар) енгізетін бірыңғай жер және әлеуметтік салықтар бойынша декларацияны жасау тәртібін қарастырады:
1) 920.00 нысаны бойынша бірыңғай жер және әлеуметтік салықтар бойынша декларация (бұдан әрі - 920.00 нысаны бойынша декларация);
2) Бірыңғай жер және әлеуметтік салықтар бойынша декларацияға 920.01 нысаны бойынша қосымша (бұдан әрі - 920.01 нысаны бойынша қосымша).
2. 920.00 нысаны бойынша декларация шаруа (фермер) қожалықтары үшін арнаулы салық режимін қолдану кезінде бірыңғай жер және әлеуметтік салықтардың сомаларын мәлімдеуге арналған.
920.01 нысаны бойынша қосымша бірыңғай жер және әлеуметтік салықтарды, сондай-ақ жеке кәсіпкер үшін және шаруа (фермер) қожалығының мүшелері үшін Мемлекеттік әлеуметтік сақтандыру қорына әлеуметтік аударымдарды және жинақтаушы зейнетақы қорына міндетті зейнетақы жарналарын есептеуге арналған. Бірыңғай жер салығын есептеу:
тұрақты және (немесе) уақытша алғашқы жер пайдалану, жеке меншік құқығындағы барлық жер телімдері бойынша;
қайталама жер пайдалану құқығындағы жер телімдері бойынша жүргізіледі.
3. Салық төлеушіде әрбір жер телімі бойынша әртүрлі көрсеткіштері (иемдену кезеңдері; жер пайдалану құқығын куәландыратын құжаттар және т.б) бар жер телімдері болған жағдайында, әр жер теліміне 920.01 нысаны бойынша қосымшаға жеке парақ толтырылады.
4. Нысандарды жасау кезінде:
1) қағаз тасығышта - нысандар қара немесе көк сиялы қаламмен немесе қаламұшпен, баспа әріптермен немесе баспа құрылғысын пайдалана отырып толтырылады;
2) электрондық тасығышта - нысандар Салық кодексінің 69-бабына сәйкес толтырылады.
