«Қазақстан Республикасындағы конституциялық заңдылықтың жай-күйі туралы»
Қазақстан Республикасы Конституциялық Кеңесінің 2006 жылғы 19 маусымдағы
№ 01-3/1 Жолдауы
Қазақстан Республикасы Конституциясының 53-бабының 11) тармақшасына сәйкес елдегі конституциялық заңдылықтың жай-күйі туралы жыл сайынғы жолдау Қазақстан Республикасының Парламентіне жіберіліп отыр.
2005 жыл Қазақстанның конституциялық дамуында бірқатар маңызды оқиғалармен ерекшеленді. Еліміздің Ата Заңына 10 жыл толды, Мемлекет басшысының кезекті сайлауы және аудан әкімдерінін эксперимент ретіндегі сайлаулары өтті, Республика Парламенті Сенаты депутаттарының жартысы қайта сайланды.
Республика жүргізіп отырған адам құқықтарына бейілділік және оларды құрметтеу бағытының жалғасы ретінде Қазақстан Біріккен Ұлттар Ұйымының Азаматтық, саяси, экономикалық, әлеуметтік және мәдени құқықтар туралы түбегейлі халықаралық пактілерін ратификациялап, ұлттық заңнамасы мен құқық қолдану практикасының осы халықаралық құжаттарға сәйкестігін қамтамасыз ету жөнінде өзіне міндеттемелер алды. Қазақстан Республикасы Президентінің «Қазақстан Республикасы Конституциясынын әлеуетін одан әрі пайдалану жөніндегі шаралар туралы» 2005 жылғы 4 мамырдағы № 1568 Жарлығының қабылдануы елде конституционализмді баянды етудің маңызды кезеңі болды.
***
2005 жылы Қазақстан Республикасы Конституциялық Кеңесі 5 қорытынды қаулы қабылдады: 2 - соттардың ұсынысы бойынша; 2 - Парламент депутаттары топтарының өтініштері бойынша; 1 - Қазақстан Республикасы Президентінің өтініші бойынша. Қаулылардың бәрінде қаралған немесе солармен байланысты нормативтік құқықтық актілердің одан әрі жетілдіруді қажет ететін кемшіліктері атап көрсетілді.
