Қазақстан Республикасы
Жоғарғы Соты Төрағасының
2006 жылғы 18 қазандағы
№ 217 өкімімен бекітілген
Аудандық, облыстық және оларға теңестірілген соттар судьяларының жоғары тұрған соттарда тағылымдамадан өту
қағидасы
Аудандық, облыстық және оларға теңестірілген соттар судьяларының жоғары тұрған соттарда тағылымдамадан өту қағидасын қараңыз (Қазақстан Республикасы Жоғарғы Соты Төрағасының 2011 жылғы 26 қаңтардағы № 13 өкімімен бекітілген)
Осы Қағида «Қазақстан Республикасының сот жүйесі мен судьяларының мәртебесі туралы» Қазақстан Республикасы Конституциялық заңының 20-бабы 1-тармағының 11) тармақшасына сәйкес, соттар қызметінің тәжірибесі, сондай-ақ судьялардың біліктілігін арттыру мәселелеріне қатысты заңдардың нормалары ескеріле отырып судьялардың кәсіптік біліктілік деңгейін арттыру мақсатында жасалды.
Осы қағида аудандық және оған теңестірілген соттар судьяларының облыстық және оған теңестірілген соттарда, облыстық және оған теңестірілген соттар судьяларының (бұдан әрі-судьялар (машықтанушылар)) Қазақстан Республикасының Жоғарғы Сотында тағылымдамадан өтуін тиімді ұйымдастыруды жүзеге асыруға бағытталған.
1. Жалпы ережелер
1. Судьялардың тағылымдамасын ұйымдастырудың басты міндеті сот төрелігін іске асырудың сапасын жоғарылату және Қазақстан Республикасының Конституциясымен және заңдарымен сот билігіне жүктелген міндеттерді тиімді орындау мақсатында заңдарды қолдану жөнінде қалыптасқан сот тәжірибесін зерделеу жолымен олардың кәсіби деңгейін көтеру болып табылады.
Тағылымдама тәлімгерлікпен, менторлықпен, семинарлармен, конференциялармен, дөңгелек столдармен және т.б. қатар үздіксіз оқытудың бір түрі болып табылады.
Тағылымдама судьяға нақты көмек болып табылады, тәжірибелік машықтарды игеруге және оларды жетілдіруге жәрдемдеседі.
