Стенограмма заседания Мажилиса Парламента Республики Казахстан
(23 мая 2007 года)
ҚАЗАҚСТАН РЕСПУБЛИКАСЫ ПАРЛАМЕНТ МӘЖІЛІСІНІҢ
ЖАЛПЫ ОТЫРЫСЫ
2007 жылғы 23 мамыр
Отырысты Қазақстан Республикасы Парламенті Мәжілісінің Төрағасы МҰХАМЕДЖАНОВ О.Б. жүргізді.
ТӨРАҒА. Қайырлы таң, құрметті әріптестер! Тіркеуден өтулеріңізді сұраймын.
Тиісті жиналым бар. 77 депутаттың 59-ы қатысып отыр. Белгілі себептермен бүгінгі отырысқа қатыса алмай отырған депутаттар: Ағатаева, Айталы, Асанов, Әбдірахманов, Әубәкіров, Бәйменов, Бобров, Дүйсекеев, Елеубаев, Жалыбин, Қосмамбетов, Рахметов, Таспихов, Трошихин. Қалғандары белгісіз себептермен қатыспай отыр.
Мәжілістің кезекті жалпы отырысын ашық деп жариялаймын.
Күн тәртібі бойынша қандай ұсыныстар бар? Басқа ұсыныс жоқ қой? Онда күн тәртібі бекітілсін деген ұсынысты дауысқа қоямын.
Нәтижесін экранға беріңіздер. Күн тәртібі бірауыздан бекітілді. 55 депутат дауыс беруге қатысып, 55 депутат жақтады.
Құрметті әріптестер, осыдан біршама уақыт бұрын біздің әріптесіміз Орынбасар Шойбекұлы Қалқабаев 50 жасқа толған болатын. Осыған байланысты Елбасының Алғыс хаты мен омырау белгісімен марапатталған болатын. Бірақ оны уақытында тапсыра алмадық, өйткені денсаулыққа байланысты Орекең жұмысқа біраз уақыт қатыса алмады. Сондықтан осы Алғыс хат пен омырау белгісін тапсыруға рұқсат етіңіздер.
ҚОЛ ШАПАЛАҚТАУ.
ТӨРАҒА. Күн тәртібіндегі мәселелерге көшеміз.
Бірінші мәселе - «Қазақстан Республикасының Үкіметі мен Азия Даму Банкі арасындағы Техникалық көмек туралы негіздемелік келісімді ратификациялау туралы» Қазақстан Республикасы Заңының жобасы бойынша қорытынды әзірлеу жөнінде. Бұл мәселе бойынша сөз депутат Баймағамбетоваға беріледі.
БАЙМАҒАМБЕТОВА Б.Б. Құрметті Төраға! Құрметті әріптестер! Жаңа аталып кеткен заң жобасын біздің комитет жұмысқа алып, 30 желтоқсанға дейін қорытынды әзірлеуге дайын. Қолдауларыңызды сұраймыз.
ТӨРАҒА. Басқа пікір жоқ па?
ОРНЫНАН. Жоқ.
ТӨРАҒА. Онда қаулы жобасы бойынша дауыс берулеріңізді сұраймын.
