«Қазақстан Республикасының ғылымын дамытудың 2007-2012 жылдарға арналған мемлекеттік бағдарламасы туралы» Қазақстан Республикасы Президентінің
2007 жылғы 20 маусымдағы № 348 Жарлығына
түсініктеме
Қазақстанның бәсекеге барынша қабілетті әлем елдерінің қатарына кіру жөніндегі стратегиялық міндеттерін іске асыру барабар ғылыми-техникалық жүйені дамыту жөніндегі стратегиялық көзқарастарды әзірлеу мен нақты шараларды орындауды талап етеді.
Қазақстан Республикасының ғылымын дамытудың 2007-2012 жылдарға арналған мемлекеттік бағдарламасы (бұдан әрі - Бағдарлама) Қазақстан Республикасы Президентінің 2007 жылғы 6 сәуірдегі № 310 Жарлығымен бекітілген Мемлекет басшысының 2005-2007 жылдардағы Қазақстан халқына жыл сайынғы жолдауларын іске асыру жөніндегі негізгі бағыттардың (іс шаралардың) жалпыұлттық жоспарына және Қазақстан Республикасы Үкіметінің 2007-2009 жылдарға арналған Бағдарламасына сәйкес, Қазақстанның әлемнің жоғары технологиялық өнімді өндіруге бағдарланған дамыған экономикасы бар, бәсекеге қабілетті елу елінің қатарына кіру жөніндегі стратегиялық міндеттерін іске асыру мақсатында әзірленді.
Осы Бағдарламаның басты мақсаты елдің орнықты әлеуметтік-экономикалық дамуы үшін талап етілетін білімді алуды, жинақтауды және беруді қамтамасыз ететін ғылым жүйесінің бәсекеге қабілеттілігі мен теңгерімділігіне қол жеткізу болып табылады.
Бұл ретте ғылымды жүйелі дамытудың негізгі басымдықтары мыналар болып табылады:
Ғылымды дамытудың мемлекеттік және жекеше секторлар қызметінің құрамдасы және ел экономикасының негізгі стратегиялық басымдығы ретінде айқындау;
Экономика мен қоғамның тың жаңалықтарға сұранысын ынталандыру (сұранысты ынталандыру);
Ғылыми идеялар мен әзірлемелерді дамыту және енгізу үшін жағдайлар жасау (ұсынысты ынталандыру).
