(БҰРЫНҒЫ РЕДАКЦИЯ)

Осы редакция 2007 жылғы 12 қазандағы енгізілген өзгерістеріне дейін қолданылды

Қазақстан Республикасы

Үкіметінің

2003 жылғы 30 қаңтардағы

№ 106 қаулысымен бекітілген

Авиациялық техникаға техникалық қызмет көрсету және жөндеу
жөніндегі қызметтердi сертификаттау
ЕРЕЖЕСI

1. Жалпы ережелер

1. Осы Авиациялық техникаға техникалық қызмет көрсету және жөндеу жөніндегі қызметтердi сертификаттау ережесi (бұдан әрi - Ереже) Қазақстан Республикасы Президентінің «Қазақстан Республикасының әуе кеңiстiгiн пайдалану және авиация қызметi туралы» 1995 жылғы 20 желтоқсандағы № 2697 заң күшi бар Жарлығының, «Азаматтық авиацияны мемлекеттік реттеу туралы» Қазақстан Республикасының 2001 жылғы 15 желтоқсандағы Заңының талаптарына сәйкес әзiрленген және Қазақстан Республикасының азаматтық авиациясында авиациялық техникаға техникалық қызмет көрсету және жөндеу жөнiндегі қызметтердi сертификаттау тәртібiн белгілейдi.

2. Осы Ережеде пайдаланылатын негiзгi терминдер мен анықтамалар:

1) авиациялық техниканы жөндеу - авиациялық техниканың жарамдылығын және жұмысқа қабiлеттілігін қалпына келтiру жөніндегi операциялар кешенi;

2) авиациялық техникаға техникалық қызмет көрсету және жөндеу орталығы - авиациялық техникаға техникалық қызмет көрсету және (немесе) жөндеудi жүзеге асыратын, осы Ережеде белгiленген тәртіппен авиациялық техникаға техникалық қызмет көрсету және жөндеу жөніндегі сертификат берiлген заңды тұлға немесе заңды тұлғаның құрылымдық бөлiмшесi;

3) өтінім - өтiнiш берушiнің сертификаттық зерттеу рәсімдерiнен өтуi үшiн уәкiлеттi органға жазбаша өтiнiшi;

4) өтiніш берушi - Авиациялық техникаға техникалық қызмет көрсету және жөндеу жөніндегі қызметке сертификат алу үшін уәкілетті органға өтiнiш берген заңды тұлға;