ҚР Ішкі істер министрінің 2014.27.10. № 738 бұйрығымен алып тасталды
Ішкі істер министрінің
2011 жылғы 27 қазандағы
№ 565 бұйрығымен бекітілген
№ 5 қосымша
Қазақстан Республикасы Ішкі істер министрлігінің Есірткі бизнесіне қарсы күрес
және есірткі айналымын бақылау комитеті туралы
ереже
(2014.04.05. берілген толықтырулармен)
1. Жалпы ережелер
1. Қазақстан Республикасы Iшкi iстер министрлiгiнiң Есiрткi бизнесiне қарсы күрес және есiрткi айналымын бақылау комитетi (бұдан әрi - Комитет) Iшкi iстер министрлігінiң (бұдан әрі - Министрлік) құзыретi шегінде есiрткi құралдарының, психотроптық заттардың, прекурсорлардың айналымы саласында мемлекеттік саясаттың іске асыруды, сондай-ақ реттеу, іске асыру және бақылау функцияларын жүзеге асыратын ведомство болып табылады.
2. Комитет өз қызметін Қазақстан Республикасының Конституциясы мен заңдарына, Қазақстан Республикасы Президентi мен Қазақстан Республикасы Үкiметiнiң актілеріне, өзге де нормативтiк құқықтық актілерге, оның ішінде Қазақстан Республикасының халықаралық шарттарына, сондай-ақ осы Ережеге сәйкес жүзеге асырады.
3. Комитеттiң құрылымын және штаттық санын Ішкі істер министрі Қазақстан Республикасының заңнамасында белгіленген тәртіппен бекiтедi.
4. Комитет мыналардан:
1) Басшылықтан;
2)Ұйымдастырушылық-аналитикалық жұмыс және бақылау басқармасынан;
3) Ведомствоаралық үйлестіру, алдын алу және әкімшілік практика басқармасынан;
4) Халықаралық ынтымақтастық бөлімінен;
5) Лицензиялау және есірткінің заңды айналымын бақылау бөлімінен;
6) Жедел-іздестіру басқармасынан;
7) «А» және жедел-ақпараттық қамтамасыз ету басқармасынан;
8) Есірткі бизнесіне қарсы күрестің өңірлік басқармасынан (орналасқан жері - Алматы қаласы);
9) Өзіндік қауіпсіздік тобынан;
10) Қаржымен қамтамасыз ету бөлімінен;
11) Тылдық қамтамасыз ету бөлімінен;
12) Кеңседен тұрады.
