«Сыртқы мемлекеттік қаржылық бақылауды жүргізу қағидасын бекіту туралы» Республикалық бюджеттің атқарылуын бақылау жөніндегі есеп комитетінің 2013 жылғы 16 сәуірдегі № 3-НП нормативтік қаулысына өзгерістер мен толықтырулар енгізу туралы
Республикалық бюджеттің атқарылуын бақылау жөніндегі есеп комитетінің Төрағасының 2014 жылғы 14 тамыздағы № 3-НҚ нормативтік қаулысы
Республикалық бюджеттің атқарылуын бақылау жөніндегі есеп комитетінің 2015 жылғы 30 қарашадағы № 17-НҚ нормативтік қаулысымен күші жойылды
Қазақстан Республикасының 2008 жылғы 4 желтоқсандағы Бюджет кодексінің 141-бабының 19) тармақшасына сәйкес Республикалық бюджеттің атқарылуын бақылау жөніндегі есеп комитеті ҚАУЛЫ ЕТЕДІ:
1. «Сыртқы мемлекеттік қаржылық бақылауды жүргізу қағидасын бекіту туралы» Республикалық бюджеттің атқарылуын бақылау жөніндегі есеп комитетінің 2013 жылғы 16 сәуірдегі № 3-НП нормативтік қаулысына (Нормативтік құқықтық актілерді мемлекеттік тіркеу тізілімінде № 8466 тіркелген, «Егемен Қазақстан» газетінде 2013 жылғы 5 маусымда № 141 (28080); 2013 жылғы 19 маусымда № 151 (28090) жарияланған) мынадай өзгерістер мен толықтырулар енгізілсін:
1) көрсетілген нормативтік қаулымен бекітілген Республикалық бюджеттің атқарылуын бақылау жөніндегі есеп комитетінің Сыртқы мемлекеттік қаржылық бақылауды жүргізу қағидасында:
10-тармақ мынадай редакцияда жазылсын:
«10. Бақылау жүргізуге тартылатын мемлекеттік органдардың (келісім бойынша), аудиторлық ұйымдардың мамандары және сарапшылар осы Қағиданы басшылыққа алады.»;
17, 18, 19, 20, 21, 22-тармақтар мынадай редакцияда жазылсын:
«17. Есеп комитетінің бақылау іс-шараларының жылдық (тоқсандық) жоспары (бұдан әрі - жылдық жоспар) Есеп комитетінің перспективалық жұмыс жоспарын, бақылау объектілерін қайталауды болдырмау мақсатында мемлекеттік қаржылық бақылау органдарымен өзара іс-қимылды ескере отырып, кезекті жылға арналған бақылау іс-шараларын сапалы және тиімді жоспарлау үшін қалаптастырылады.
