Қазақстан Республикасы Үкіметінің
2019 жылғы 31 желтоқсандағы
№ 1060 қаулысымен
бекітілген
Осы редакция 2021 жылғы 13 қазанда енгізілген өзгерістеріне дейін қолданылды (2021 ж. 2 қарашадан бастап қолданысқа енгізілді)
«Бизнестің жол картасы-2025» бизнесті қолдау мен дамытудың
мемлекеттік бағдарламасы шеңберінде кредиттер бойынша кепілдіктер беру
қағидалары
(2021.13.10. берілген өзгерістер мен толықтырулармен)
1-тарау. Жалпы ережелер
1. Осы «Бизнестің жол картасы-2025» бизнесті қолдау мен дамытудың мемлекеттік бағдарламасы шеңберінде кредиттер бойынша кепілдіктер беру қағидалары (бұдан әрі - Кепілдік беру қағидалары) 2015 жылғы 29 қазандағы Қазақстан Республикасының Кәсіпкерлік кодексіне (бұдан әрі - Кодекс) сәйкес әзірленген және кәсіпкерлердің кредиттері бойынша міндеттемелердің орындалуын ішінара қамтамасыз ету ретінде кепілдіктер беру тетігі мен шарттарын айқындайды.
2. Кепілдік беру Қазақстан Республикасы Үкіметінің 2019 жылғы 24 желтоқсандағы № 968 қаулысымен бекітілген «Бизнестің жол картасы-2025» бизнесті қолдау мен дамытудың мемлекеттік бағдарламасы (бұдан әрі - Бағдарлама)/«Қолжетімді кредит беру міндеттерін шешу үшін ұзақ мерзімді теңгелік өтімділікті қамтамасыз етудің кейбір мәселелері туралы» Қазақстан Республикасы Үкіметінің 2018 жылғы 11 желтоқсандағы № 820 қаулысымен бекітілген Басым жобаларды кредиттеу тетігі (бұдан әрі - Тетік) шеңберінде кәсіпкерлердің кредиттері бойынша жүзеге асырылады.
3. Кепілдік беру кәсіпкерлерге қаржылық қолдау көрсету құралы болып табылады және кредит ресурстарына қолжетімділікті кеңейту мен қамтамасыз ету үшін пайдаланылады.
ҚР Үкіметінің 2020.20.04. № 225 Қаулысымен 3-1-тармақпен толықтырылды; ҚР Үкіметінің 2021.28.06. № 441 Қаулысымен 3-1-тармақ жаңа редакцияда (бұр.ред.қара)
3-1. Кепілдік беру республикалық және/немесе жергілікті бюджеттердің қаражаты есебінен қаржыландырылады.
