Осы редакция 2021 жылғы 26 қаңтарда енгізілген өзгерістеріне дейін қолданылды
ҚР Ішкі істер министрінің 2018.16.10. № 721 бұйрығымен 54-қосымшамен толықтырылды; ҚР Ішкі істер министрінің 2019.24.09. № 823 бұйрығымен ереже жаңа редакцияда (бұр.ред.қара)
Қазақстан Республикасы
Ішкі істер министрінің
2014 жылғы 1 қазандағы
№ 662 бұйрығына
54-қосымша
Қазақстан Республикасы Ішкі істер министрлігі Түркістан облысының Полиция департаменті туралы
ЕРЕЖЕ
(2020.17.01. берілген өзгерістермен)
1. Жалпы ережелер
1. Түркістан облысының Полиция департаменті (бұдан әрі - Департамент) облыс аумағындағы полиция органдары мен бөліністеріне басшылық етуді жүзеге асыратын Қазақстан Республикасы Ішкі істер министрлігінің (бұдан әрі - Министрлік) аумақтық бөлінісі болып табылады.
2. Департамент өз қызметін Қазақстан Республикасының Конституциясына және заңдарына, Қазақстан Республикасының Президенті мен Үкіметінің актілеріне, өзге де нормативтік құқықтық актілерге, сондай-ақ осы Ережеге сәйкес жүзеге асырады.
3. Департамент мемлекеттік мекеме ұйымдық-құқықтық нысанындағы заңды тұлға болып табылады, мемлекеттік тілде өз атауы бар мөрі мен мөртабандары, белгіленген үлгідегі бланкілері, сондай-ақ Қазақстан Республикасының заңнамасына сәйкес қазынашылық органдарында шоттары бар.
4. Департамент азаматтық-құқықтық қатынастарға өз атынан түседі.
5. Департамент егер заңнамаға сәйкес оған уәкілеттік берілген болса, мемлекеттің атынан азаматтық-құқықтық қатынастардың тарапы болуға құқығы бар.
6. Департамент өз құзыретінің мәселелері бойынша заңнамада белгіленген тәртіпте Департамент бастығының бұйрықтарымен ресімделетін шешімдер қабылдайды.
7. Департамент құрылымы мен штат санының лимиті қолданыстағы заңнамаға сәйкес бекітіледі.
8. Департаменттің орналасқан жері: индексі 161201, Қазақстан Республикасы, Түркістан облысы, Түркістан қаласы, Ерубаев көшесі, 197-құрылыс.
9. Департаменттің толық атауы - «Қазақстан Республикасы Ішкі істер министрлігі Түркістан облысының Полиция департаменті» мемлекеттік мекемесі.
