Осы редакция 2016 жылғы 17 наурызда енгізілген өзгерістеріне дейін қолданылды
Қазақстан Республикасы
Денсаулық сақтау және
әлеуметтік даму министрінің
2015 жылғы 26 наурыздағы
№ 165 бұйрығына 4-қосымша
Халықты әлеуметтік қорғау саласында уақытша болу жағдайында
арнаулы әлеуметтік қызмет көрсету стандарты
1. Жалпы ережелер
1. Халықты әлеуметтік қорғау саласында уақытша болу жағдайында арнаулы әлеуметтік қызмет көрсету стандарты (бұдан әрі - стандарт) «Арнаулы әлеуметтік қызметтер туралы» Қазақстан Республикасының 2008 жылғы 29 желтоқсандағы Заңына сәйкес әзірленді.
2. Осы стандарт белгілі бір тұрғылықты жері жоқ адамдардың (бұдан әрі - қызмет алушылар) тәулік бойы уақытша тұруына (бір жылға дейін) немесе уақытша болуына (тәуліктің түнгі уақытында) арналған, меншік нысаны мемлекеттік және мемлекеттік емес уақытша болу жағдайында арнаулы әлеуметтік қызмет көрсететін ұйымдарда (бұдан әрі - уақытша болу ұйымдары) арнаулы әлеуметтік қызмет көрсетудің көлемін және шарттары мен тәртібіне қойылатын талаптарды белгілейді, уақытша болу ұйымдары қызметінің тәртібін, арнаулы әлеуметтік қызмет көрсету, тоқтату (тоқтата тұру) шарттарын айқындайды.
3. Уақытша болу ұйымдары қызмет алушылар үшін әлеуметтік бейімдеу орталықтары, түнде болу үйлері түрінде құрылады.
Әлеуметтік бейімдеу орталықтарында қызмет алушылар үшін құрылымдық бөлімшелер - түнде болу бөлімшесі мен мобильді әлеуметтік патруль қызметі құрылуы мүмкін.
4. Осы стандартты меншік нысанына қарамастан уақытша болу жағдайында арнаулы әлеуметтік қызмет көрсететін барлық субъектілер сақтайды.
5. Уақытша болу ұйымдары адам саны жүз мыңнан асатын қалаларда заңнамада белгіленген тәртіппен құрылады.
Жергілікті атқарушы органдар өз шешімімен халық саны отыз мың және одан астам адам елді мекендерде уақытша болу ұйымдарын құруға құқылы.
6. Уақытша болу ұйымдарына кәмелетке толған қызмет алушылар, оның ішінде түрлі себептер бойынша жеке басын куәландыратын құжаттары жоқ, баспанасы жоқ немесе одан айырылған адамдар қабылданады.
