ҚАЗАҚСТАН РЕСПУБЛИКАСЫ
ПАРЛАМЕНТІНІҢ МӘЖІЛІСІ
(Алтыншы сайланымның үшінші сессиясы)
Стенограмма
2018 жылғы 30 мамыр
ҚАЗАҚСТАН РЕСПУБЛИКАСЫ ПАРЛАМЕНТІНІҢ БАСЫЛЫМЫ
Астана 2018
ҚАЗАҚСТАН РЕСПУБЛИКАСЫ ПАРЛАМЕНТІ МӘЖІЛІСІНІҢ
ЖАЛПЫ ОТЫРЫСЫ
2018 жылғы 30 мамыр
Отырысты Қазақстан Республикасы Парламенті Мәжілісінің Төрағасы Н.З. НЫҒМАТУЛИН жүргізді.
ТӨРАҒА. Қайырлы күн, құрметті әріптестер! Құрметті депутаттар, баршаңызды тіркеуден өтулеріңізді сұраймын. Прошу пройти процедуру регистрации, уважаемые коллеги.
Жұмысымызды бастау үшін қажетті кворум бар. Мәжілістің жалпы отырысын ашық деп жариялаймын.
Құрметті әріптестер, күн тәртібі бойынша сұрақтарыңыз бар ма?
ОРНЫНАН. Жоқ.
ТӨРАҒА. Онда күн тәртібі бойынша дауыс берулеріңізді сұраймын.
Нәтижесін экранға беріңіздер. Күн тәртібі бекітілді.
Құрметті депутаттар, енді күн тәртібіндегі мәселелерді қарауға көшеміз.
Бірінші мәселе - «1996 жылғы 12 маусымдағы Табыс пен мүлікке қосарланған салық салуды болдырмау туралы Қазақстан Республикасының Үкіметі мен Өзбекстан Республикасы Үкіметінің арасындағы келісімге өзгерістер мен толықтырулар енгізу туралы Қазақстан Республикасының Үкіметі мен Өзбекстан Республикасының Үкіметі арасындағы хаттаманы ратификациялау туралы» Қазақстан Республикасы Заңының жобасы бойынша қорытынды әзірлеу жөнінде. Бұл мәселе бойынша сөз Қаржы және бюджет комитетінің төрайымы депутат Қарақұсова Гүлжан Жанпейісқызына беріледі.
ҚАРАҚҰСОВА Г.Ж. Рақмет, құрметті Нұрлан Зайроллаұлы.
Құрметті әріптестер! Аталған заң жобасы Мәжіліске 2018 жылғы 14 мамырда енгізілді.
Аталған заң жобасының мақсаты Қазақстан Республикасы мен Өзбекстан Республикасы арасында ақпарат алмасу арқылы салық органдарының ынтымақтастығын дамыту және Қазақстан Республикасына жеке кірістер түрлеріне салық салу құқығын беру бөлігінде келісімнің жекелеген ережелерін қайта қарау болып табылады.
Қаржы және бюджет комитеті заң жобасы бойынша 2018 жылғы 19 желтоқсанға дейін қорытынды әзірлеуге дайын.
