«Педагог қызметкерлер мен оларға теңестірілген тұлғалардың лауазымдарының үлгілік біліктілік сипаттамаларын бекіту туралы» Қазақстан Республикасы Білім және ғылым министрінің 2009 жылғы 13 шілдедегі № 338 бұйрығына толықтыру енгізу туралы
Қазақстан Республикасы Білім және ғылым министрінің м.а. 2017 жылғы 12 мамырдағы № 217 бұйрығы
БҰЙЫРАМЫН:
1. «Педагог қызметкерлер мен оларға теңестірілген тұлғалардың лауазымдарының үлгілік біліктілік сипаттамаларын бекіту туралы» Қазақстан Республикасы Білім және ғылым министрінің 2009 жылғы 13 шілдедегі № 338 бұйрығына (Нормативтік құқықтық актілерді мемлекеттік тіркеу тізілімінде № 5750 болып тіркелген, 2010 жылғы 22 қаңтардағы № 10 (1632) «Заң газеті» газетінде жарияланған) мынадай толықтыру енгізілсін:
көрсетілген бұйрықпен бекітілген Педагог қызметкерлер мен оларға теңестірілген тұлғалардың лауазымдарының үлгілік біліктілік сипаттамаларында:
«4. Мектепке дейінгі тәрбие мен оқыту, бастауыш, негізгі орта және жалпы орта білім беру жүйесінің, интернаттық және қосымша білім беру ұйымдарының педагог қызметкерлері мен оларға теңестірілген тұлғалардың лауазымдарының біліктілік сипаттамасы» деген 4-тарауда «Білім беру ұйымдарындағы барлық мамандық мұғалімдері» деген бөлімнен кейін мынадай мазмұндағы бөліммен толықтырылсын:
«Шағын жинақты мектеп педагогі
Лауазымдық міндеттері: Мемлекеттік жалпыға міндетті білім беру стандарттарына сәйкес оқытылатын пәннің ерекшелігін ескере отырып, оқушыларды оқыту мен тәрбиелеуді жүзеге асырады. Білім алушылардың жеке басының жалпы мәдениетін қалыптастыруға және оның әлеуметтенуіне ықпал етеді, білім алушылар мен тәрбиеленушілердің жеке қабілеттерін анықтайды және дамытуға жәрдем көрсетеді.
Оқытудың әртүрлі нысандарын, тәсілдерін, әдістері мен құралдарын пайдаланады. Пәнді оқытудың күнделікті сабақ жоспарларын құрады. Оқыту процесіне білім беру технологияларын, оның ішінде ақпараттық технологияларды енгізуді қамтамасыз етеді.
