«Әскери міндеттілер мен әскерге шақырылушыларды әскери есепке алу қағидаларын бекіту туралы»Қазақстан Республикасы Қорғаныс министрінің 2017 жылғы 24 қаңтардағы № 28 бұйрығына өзгерістер мен толықтырулар енгізу туралы
Қазақстан Республикасы Қорғаныс министрінің 2021 жылғы 20 тамыздағы № 555 бұйрығы
БҰЙЫРАМЫН:
1. «Әскери міндеттілер мен әскерге шақырылушыларды әскери есепке алу қағидаларын бекіту туралы» Қазақстан Республикасы Қорғаныс министрінің 2017 жылғы 24 қаңтардағы № 28 бұйрығына (Нормативтік құқықтық актілерді мемлекеттік тіркеу тізілімінде № 14881 болып тіркелген) мынадай өзгерістер енгізілсін:
көрсетілген бұйрықпен бекітілген Әскери міндеттілер мен әскерге шақырылушыларды әскери есепке алу қағидаларында:
9-тармақ мынадай редакцияда жазылсын:
«9. Әскерге шақыру учаскесіне тіркеу жылында он жеті жасқа толатын Қазақстан Республикасының ер азаматтары ағымдағы жылғы қаңтар - наурызда ауданның (облыстық маңызы бар қаланың) ЖӘБО-сына бастапқы әскери есепке қойылуға тиіс.
Кейінгі әскери есепке қою осы Қағидалардың 89-тармағына сәйкес жүзеге асырылады.
Азаматты тұрғылықты жерін ауыстырған кезде әскери есептен алуды ауданның (облыстық маңызы бар қаланың) ЖӘБО азаматты жаңа тұрғылықты жері бойынша әскери есепке қойғаннан кейін жүзеге асырады.
Медициналық (әскери-дәрігерлік) комиссия әскери есептен шығарумен әскери қызметке жарамсыз деп таныған азаматтар әскери есепке қабылданбайды.»;
11-тармақтың 1) тармақшасы мынадай редакцияда жазылсын:
«1) өзімен бірге тіркеу туралы куәлігін, сондай-ақ Қазақстан Республикасы азаматының жеке куәлігі мен жүргізуші куәлігін (ол бар болған кезде) немесе цифрлық құжаттар сервисінен жеке куәлігі мен жүргізуші куәлігінің (ол бар болған кезде) электрондық құжатын алып, шақырту (шақырту қағазы) бойынша белгіленген уақытта және жерге ауданның (облыстық маңызы бар қаланың) ЖӘБО-сына немесе ауылдың, кенттің, ауылдық округтің әкімдігіне баруы;»;
25-тармақ мынадай редакцияда жазылсын:
