Қылмыстық процеске қатысушы адамдарды мемлекеттік қорғау туралы
Қазақстан Республикасының 2000 жылғы 5 шілдедегі
N 72-ІІ Заңы
Осы редакция 2004 ж. 20 желтоқсандағы енгізілген өзгерістеріне дейін қолданылды
Осы Заң қылмыстық процеске құқыққа қарсы араласудың жолын кесу мақсатында, қылмыстық процеске қатысушы адамдардың, олардың отбасы мүшелерi мен жақын туыстарының өмiрiн, денсаулығын, мүлкiн, заңды құқықтарын, мүдделерiн мемлекеттiк қорғау, олардың қауiпсiздiгiн қамтамасыз ету шараларының жүйесiн белгiлейдi.
1-тарау. Жалпы ережелер
1-бап. Қылмыстық процеске қатысушы адамдарды мемлекеттiк қорғауды қамтамасыз ету
Қылмыстық процеске қатысушы адамдарды, олардың отбасы мүшелерi мен жақын туыстарын мемлекеттiк қорғауды қамтамасыз ету - аталған адамдардың өмiрiне, денсаулығына және мүлкiне нақты қол сұғу қаупi төнген кезде қолданылатын, уәкiлеттi мемлекеттiк органдардың осы Заңда көзделген қауiпсiздiк, құқықтық және әлеуметтiк қорғау шараларын (бұдан әрi мемлекеттiк қорғау шаралары) жүзеге асыруынан тұрады.
2-бап. Қауiпсiздiктi қамтамасыз етушi органдар
Қорғалатын адамдардың қауiпсiздiгiн:
1) қауiпсiздiк шараларын қолдану туралы шешiм қабылдаушы орган;
2) қауiпсiздiк шараларын жүзеге асырушы орган қамтамасыз етедi.
3-бап. Мемлекеттiк қорғауға жататын адамдар
Қазақстан Республикасының Қылмыстық iс жүргiзу кодексi мен осы Заңға сәйкес:
1) судьялар;
2) қосшы билер;
3) прокурорлар;
4) тергеушiлер;
5) анықтаушылар;
6) жедел-iздестiру қызметiн жүзеге асырушы адамдар;
7) қорғаушылар;
8) сарапшылар;
9) мамандар;
10) сот отырыстарының хатшылары, сот приставтары;
11) жәбiрленушiлер;
12) куәлер;
13) сезiктiлер;
14) айыпталушылар;
15) аудармашылар;
16) куәгерлер;
17) заңды өкiлдер, өкiлдер;
18) азаматтық талапкерлер, азаматтық жауап берушiлер;
19) осы баптың 1) - 18) тармақшаларында аталған адамдардың отбасы мүшелерi, жақын туыстары мемлекеттiк қорғауға жатады.
