Жоба
Қазақстан Республикасының
Заңы
Алқабилер туралы
ҚР Үкіметінің 2005.11.06. № 577 қаулысымен ҚР Парламентi Мәжілісiнiң қарауына енгiзiлді
Осы Заң алқабилердiң құқықтық мәртебесiн, сондай-ақ қылмыстық сот iсiн жүргiзуге қатысуды қамтамасыз етудiң құқықтық, экономикалық және ұйымдық негiздерiн айқындайды және алқабилер тәуелсiздігінiң кепiлдiгiн белгiлейдi.
1-бап. Осы Заңда пайдаланылатын негiзгi ұғымдар
Осы Заңда мынадай негiзгi ұғымдар пайдаланылады:
1) алқабилерге кандидаттардың қосымша тiзiмi - алқабилерге кандидаттардың бірыңғай және қосалқы тiзiм ресурстары болмаған жағдайда, жасалатын облыстан (республикалық маңызы бар қаладан, астанадан) алқабилерге кандидаттардың тiзiмi;
2) алқабилерге кандидаттардың бірыңғай тiзiмi - тиiстi облыстық және оған теңестiрiлген сот төрағасы белгiлеген азаматтардың санын қамтитын облыстан (республикалық маңызы бар қаладан, астанадан) алқабилерге кандидаттардың негізгi тiзiмi;
3) алқабилерге кандидаттардың қосалқы тiзiмi - алқабилерге кандидаттардың бірыңғай тiзiм ресурстарын пайдаланғаннан кейiн алқабилердi iрiктеу рәсiмдерiне алқабилерге кандидаттарды тарту үшiн облыс орталығында (астананың, республикалық маңызы бар қаланың) тұратын азаматтар қатарынан тағайындалған алқабилерге кандидаттардың тiзiмi;
4) алқабилерге кандидаттар - Қазақстан Республикасының Қылмыстық iс жүргiзу кодексiне сәйкес кейiннен алқабилерге кандидаттарды iрiктеу рәсiмiне қатысу үшiн алқабилерге кандидаттардың тiзiмiне енгiзiлген Қазақстан Республикасының азаматы;
5) алқабилер - заңда белгiленген тәртiппен соттың қылмыстық iстi қарауға қатысуға шақырған Қазақстан Республикасының азаматы;
6) алқабилерге кандидаттардың бастапқы тiзiмi - алқабилерге кандидаттардың бірыңғай тiзiмiн жасау кезiнде негізiн құрайтын ауданнан (облыстық маңызы бар қаладан) алқабилерге кандидаттардың тiзiмi;
