«Самұрық-Қазына» жылжымайтын мүлік қоры» акционерлік қоғамының кейбір мәселелері туралы» Қазақстан Республикасы Үкіметінің 2009 жылғы 14 мамырдағы № 707 Қаулысы (2011.13.12. берілген өзгерістер мен толықтырулармен)

«Самұрық-Қазына» жылжымайтын мүлік қоры» акционерлік қоғамының кейбір мәселелері туралы
Қазақстан Республикасы Үкіметінің 2009 жылғы 14 мамырдағы № 707 Қаулысы

(2011.13.12. берілген өзгерістер мен толықтырулармен)

«Самұрық-Қазына» ұлттық әл-ауқат қоры» акционерлік қоғамының ұсыныстарын ескере отырып, жылжымайтын мүлік нарығындағы проблемаларды шешу жөнінде дағдарысқа қарсы шараларды іске асыру мақсатында Қазақстан Республикасының Үкіметі ҚАУЛЫ ЕТЕДІ:

1. «Қазақстан Республикасы Үкіметінің, Қазақстан Республикасы Ұлттық Банкінің және Қазақстан Республикасы Қаржы нарығын және қаржы ұйымдарын реттеу мен қадағалау агенттігінің Экономиканы және қаржы жүйесін тұрақтандыру жөніндегі 2009 - 2010 жылдарға арналған бірлескен іс-қимыл жоспарын іске асыру жөніндегі іс-шаралар жоспарын бекіту туралы» Қазақстан Республикасы Үкіметінің 2009 жылғы 13 қаңтардағы № 6 қаулысына мынадай толықтыру енгізілсін:

көрсетілген қаулымен бекітілген Қазақстан Республикасы Үкіметінің, Қазақстан Республикасы Ұлттық Банкінің және Қазақстан Республикасы Қаржы нарығын және қаржы ұйымдарын реттеу мен қадағалау агенттігінің Экономиканы және қаржы жүйесін тұрақтандыру жөніндегі 2009 - 2010 жылдарға арналған бірлескен іс-қимыл жоспарын іске асыру жөніндегі іс-шаралар жоспарында:

«Жылжымайтын мүлік нарығындағы проблемаларды шешу» деген III бөлімде:

«Қосымша шаралар» деген кеші бөлім мынадай мазмұндағы 13-1-тармақшамен толықтырылсын:

«

».

ҚР Үкіметінің 2010.28.06. № 659 қаулысымен 2-тармақ өзгертілді (бұр.ред.қара)

2. «Самұрық-Қазына» ұлттық әл-ауқат қоры» акционерлік қоғамы ұсынған, «Самұрық-Қазына» жылжымайтын мүлік қоры» акционерлік қоғамы (бұдан әрі - Жылжымайтын мүлік қоры) қаржыландыратын және/немесе сатып алатын тұрғын және тұрғын емес үй-жайлардың құнын айқындау тәсілдері мақұлдансын:

Жылжымайтын мүлік қоры тұрғын және тұрғын емес үй-жайларды мынадай құн бойынша сатып алуды жүзеге асырады:

1) тұрғын және тұрғын емес үй-жайлардың сатып алынатын алаңының (бұдан әрі - сатып алынатын алаң) бір шаршы метрі үшін сатып алу құны бойынша;

2) сатып алынатын алаңның бір шаршы метрінің құрылысына жұмсалатын шығындардың өзіндік құны бойынша.

3. Сатып алынатын алаңның 1 шаршы метрін сатып алу құны мына формуланы қолдану жолымен айқындалады:

Бс = Бт* К

мұндағы

Бс - сатып алынатын алаңның 1 шаршы метрін сатып алу құны,

Бт - осы қаулының 4-тармағына сәйкес айқындалған сатып алынатын алаңның 1 шаршы метрі үшін орташа теңдестірілген құн,

К - құрылыс объектісінің орналасуымен (аймағымен) және басқа да сапалық сипатымен айқындалатын коэффициент.

ҚР Үкіметінің 2011.03.07. № 772 Қаулысымен 4-тармақ өзгертілді (бұр.ред.қара)

4. Қосымша құрылыс-монтаждау, әрлеу, ішкі қаптау, бояу, түсқағаз жапсыру жұмыстарын жүзеге асырмай, таза еден орнатпай, санитарлық-техникалық жабдықтар мен құралдарды, тұрмыстық мақсаттағы электротехникалық құралдарды, асханалық газ және электр пештерін, пәтер ішіндегі және пәтердегі есік блоктарын, терезелерді орнатпай және инженерлік-техникалық желілерді орнатпай объектіні (үй-жайды) тиістілігі бойынша (тұруға) пайдалануға болатын дайын күйдегі жылжымайтын мүлік объектісінің тұрғын және тұрғын емес үй-жайларының сатып алынатын алаңының 1 шаршы метрі үшін орташа теңдестірілген құн:

Астана қаласы мен Ақмола облысында - 96000 теңгені;

Алматы қаласы мен Алматы облысында - 120000 теңгені құрайды.

ҚР Үкіметінің 2010.28.06. № 659 қаулысымен 5-тармақ өзгертілді (бұр.ред.қара)

5. Сатып алынатын алаңның бір шаршы метрінің құрылысына жұмсалатын шығындардың өзіндік құны бойынша құрылысы аяқталмаған объектілерді қаржыландырылған және/немесе сатып алған кезде өзіндік құн Қазақстан Республикасының заңнамасына сәйкес құрылыс жобасына тәуелсіз сараптама жүргізуге құқығы бар ұйымның қорытындысымен расталған құрылысты аяқтауға арналған сметалық құжаттаманың негізінде айқындалады.

ҚР Үкіметінің 2011.13.12. № 1513 Қаулысымен 5-1-тармақпен толықтырылды

5-1. Қазақстан Республикасы Үкіметінің шешімі бойынша Жылжымайтын мүлік қорының тұрғын және тұрғын емес үй-жайларды сатып алуының өзге шарттары белгіленуі мүмкін.

6. «Самұрық-Қазына» Ұлттық әл-ауқат қоры» акционерлік қоғамы осы қаулыдан туындайтын өзге де шараларды қабылдасын.

7. Осы қаулы қол қойылған күнінен бастап қолданысқа енгізіледі.