Қазақстан Республикасы
Өнеркәсіп және
құрылыс министрінің
2026 жылғы 4 қарашадағы
№ 560 бұйрығына 12-қосымша
Кәсіптік стандарт:
«Құрылыстағы геодезиялық жұмыстар»
1-тарау. Жалпы ережелер
1. Кәсіптік стандарттың қолдану аясы: «Құрылыстағы геодезиялық жұмыстар» кәсіптік стандарты «Кәсіби біліктіліктер туралы» Қазақстан Республикасының Заңы 5-бабының 5-тармағына сәйкес әзірленді және ғимараттар мен құрылыстарды салу, реконструкциялау және пайдалану кезінде геодезиялық жұмыстарды орындайтын қызметкерлердің кәсіби қызметіне қойылатын бірыңғай талаптарды белгілеуге арналған. Кәсіптік стандарт қызметкерлердің біліктілігіне қойылатын талаптарды айқындау, кәсіптік біліктіліктерді бағалау және растау, кадрларды іріктеу және орналастыру, сондай-ақ мамандарды даярлау, қайта даярлау және біліктілігін арттыру жөніндегі білім беру бағдарламаларын әзірлеу кезінде қолданылады. Кәсіптік стандарттың ережелері жұмыс берушілердің, білім беру ұйымдарының, кәсіптік біліктіліктерді тану орталықтарының, қызметкерлердің және кәсіптік біліктіліктер жүйесінің өзге де қатысушыларының пайдалануы үшін арналған.
2. Осы кәсіптік стандартта мынадай терминдер, анықтамалар мен қысқартулар қолданылады:
1) Салалық біліктілік шеңбері (СБШ) - салада танылатын сараланған біліктілік деңгейлерінің негіздемелік құрылымы болып табылатын ұлттық біліктілік жүйесінің құрамдас бөлігі (кіші жүйесі);
2) Кәсіби стандарт - кәсіби қызметтің нақты саласында біліктілік пен құзыреттілік деңгейіне, еңбек мазмұнына, сапасына және жағдайына қойылатын талаптарды анықтайтын стандарт;
3) Инженерлік іздестіру материалдары - Есепті техникалық құжаттама түрінде ұсынылған инженерлік ізденістер нәтижелерінің негізі болып табылатын инженерлік ізденістерді орындау процесінде алынған нақты деректер;
4) Инженерлік-Топографиялық жоспар - Жер бедерін, жер асты және жер үсті коммуникациялары мен құрылыстарын қоса алғанда, оларды жобалау, салу, пайдалану және бұзу (бөлшектеу) үшін қажетті техникалық сипаттамалары бар жағдай объектілерін көрсететін Топографиялық жоспар;