Ел экономикасының мұнай-газ секторындағы мемлекеттің мүдделерін одан әрі қамтамасыз ету жөніндегі шаралар туралы Қазақстан Республикасы Президентінің 2002 ж. 20 ақпандағы № 811 Жарлығы

Ел экономикасының мұнай-газ секторындағы мемлекеттің мүдделерін одан әрі
қамтамасыз ету жөніндегі шаралар туралы Қазақстан Республикасы
Президентінің 2002 ж. 20 ақпандағы № 811 Жарлығы

Ел экономикасының мұнай-газ секторындағы Қазақстан Республикасының мүдделерін қамтамасыз ету және қорғау деңгейін арттыру мақсатында қаулы етемін:

1. "Қазақойл" ұлттық мұнай-газ компаниясы" және "Мұнай және газ тасымалдау" ұлттық компаниясы" жабық акционерлік қоғамдарын біріктіру жолымен "ҚазМұнайГаз" ұлттық компаниясы" жабық акционерлік қоғамы (бұдан әрі - ЖАҚ) құрылсын.

2. ЖАҚ-тың қызметінің негізгі мәні:

мұнай-газ саласында біртұтас мемлекеттік саясатты іске асыруға қатысу;

республиканың мұнай-газ ресурстарын тиімді және ұтымды игеруді қамтамасыз ету;

мұнай және газ ресурстарын пайдалану, молайту және одан әрі ұлғайту стратегиясын әзірлеуге қатысу;

келісімшарттарға міндетті үлестік қатысу арқылы мұнай-газ операцияларын жүзеге асыратын мердігерлермен келісімшарттарда заңнамада белгіленген тәртіппен мемлекет мүдделерін білдіру;