(БҰРЫНҒЫ РЕДАКЦИЯ) ҚР 1993 Ж. 8 ЖЕЛТОҚСАНДАҒЫ № № 2572-XII ЗАҢЫ

Қазақстан Республикасының әкiмшiлiк-аумақтық құрылысы туралы
1993 жылғы 8 желтоқсандағы № 2572-XII Қазақстан Республикасының Заңы

(2013.21.01. берілген өзгерістер мен толықтыруларымен)

Осы редакция 2013 жылғы 3 шілдеде енгізілген өзгерістеріне дейін қолданылды

2013.21.01. № 72-V ҚР Заңымен бүкіл мәтін бойынша «поселке», «поселкелер», «поселкелерге», «поселкелері», «поселкелерді», «поселкелердің» деген сөздер тиісінше «кент», «кенттер», «кенттерге», «кенттері», «кенттерді», «кенттердің» деген сөздермен ауыстырылды және бүкіл мәтін бойынша «ауыл (село)», «ауылдық (селолық)», «ауылдардың (селолардың)», «ауылдарды (селоларды)», «ауылдар (селолар)», «ауылдарға (селоларға)» деген сөздер тиісінше «ауыл», «ауылдық», «ауылдардың», «ауылдарды», «ауылдар», «ауылдарға» деген сөздермен ауыстырылды (ресми жарияланғанынан кейін үш ай өткен соң қолданысқа енгізiлдi) (бұр. ред. қара)

1 бөлiм. ЖАЛПЫ ЕРЕЖЕЛЕР

1-бап. Қазақстан Республикасы әкiмшiлiк-аумақтық құрылысының жүйесi

Қазақстан Республикасы әкiмшiлiк-аумақтық құрылысының жүйесiне мынадай әкiмшiлiк-аумақтық бiрлiктер кiредi: ауыл, кент, ауылдық округ, қаладағы аудан, қала, аудан, облыс.

2004 ж. 11 мамырдағы № 552-II ҚР Заңымен; 2006.04.11 № 184-III ҚР Заңымен (2007 жылғы 1 қаңтардан бастап қолданысқа енгiзiлдi) (бұр. ред. қара); 2013.21.01. № 72-V ҚР Заңымен (ресми жарияланғанынан кейін үш ай өткен соң қолданысқа енгізiлдi) (бұр. ред. қара) 2-бап өзгертілді

2-бап. Әкiмшiлiк-аумақтық бiрлiктердiң категориялары

Қазақстан Республикасы аумағының республикалық және жергiлiктi мүдделерiн қолайлы ұштастыру негiзiнде мемлекеттік басқаруды жүзеге асыру негiзгi екi категорияға - аймақтарға және елдi мекендерге бөлiнедi.

Аймақ - республиканың бiрнеше елдi мекендерi енгiзiлетiн, оның мүддесi үшiн құрылатын және басқарылатын республика аумағының бiр бөлiгi.

Республикалық әкiмшiлiк-аумақтық құрылыстың негiзгi буындары ретiнде облыс, аудан және ауылдық округ аймақтар болып табылады.