Жоғары базалық білім (бакалавриат) туралы Ережені бекіту туралы
Қазақстан Республикасы Білім және ғылым министрлігі
2000 жылғы 1 қарашадағы № 1034 бұйрығы
Осы редакция 2005 ж. 19 мамырдағы енгізілген өзгерістеріне дейін қолданылды
Жоғары кәсiби білiм беретiн білім ұйымдарында жоғары базалық білімнiң оқу-кәсіптiк бағдарламасын жүзеге асыру мақсатында БҰЙЫРАМЫН:
1. Қоса берiлген "Жоғары базалық білім (бакалавриат) туралы Ереже" бекітілсiн.
2. Жоғары білім департаменті (Ә. Әбжаппаров) осы бұйрықты белгіленген тәртіпте Қазақстан Республикасы Әдiлет министрлігіне мемлекеттік тіркеуден өткізуге ұсынсын.
3. Осы бұйрық мемлекеттік тiркеуден өткен күнінен бастап күшiне енедi.
4. Осы бұйрықтың орындалуын бақылау вице-Министр Ә. Ахметовке жүктелсін.
Министр
Білім және ғылым министрлігінің
2000 жылғы 1 қарашадағы № 1034
бұйрығымен бекітілген
Жоғары базалық білім (бакалавриат)
туралы Ереже
1. Жалпы ережелер
1. Жоғары базалық білім (бакалавриат) туралы Ереже 1999 жылғы 7 маусымдағы Қазақстан Республикасының "Білім туралы" Заңы (бұдан әрi - Заң) мен Қазақстан Республикасы Үкіметінiң 1999 жылғы 2 желтоқсандағы № 1845 "Жоғары кәсiптiк білiм берудiң көп деңгейлi құрылымы туралы Ереженi бекіту туралы" қаулысына (бұдан әрi - Қаулы) сәйкес әзiрленген.