Қылмыстық істер бойынша мемлекет мүддесіне өкілдік ету және сот актілерінің заңдылығына прокурорлық қадағалауды ұйымдастыру туралы
Қазақстан Республикасы Бас Прокурорының 2011 жылғы 7 қарашадағы № 105 бұйрығы
(2013.08.10. берілген өзгерістер мен толықтырулармен)
ҚР Бас Прокурорының 2015 жылғы 5 қаңтардағы № 1 бұйрығымен күші жойылды
Бірінші, апелляциялық, кассациялық және қадағалау сатысындағы соттарда прокурорлардың өкілеттіктерін тиісінше іске асыруын қамтамасыз ету мақсатында, «Прокуратура туралы» Қазақстан Республикасының Заңының 11-бабын басшылыққа алып, БҰЙЫРАМЫН:
Бас әскери прокурор, Бас көлік прокуроры, облыстардың, Астана және Алматы қалаларының прокурорлары (бұдан әрі - облыс прокурорлары), қалалық және аудандық, әскери прокурорлар және өзге де мамандандырылған прокурорлар қылмыстық істер бойынша мемлекет мүддесіне өкілдік етуді және сот актілерінің заңдылығын қадағалауды прокуратура органдарының қызметіндегі азаматтардың конституциялық құқықтары мен бостандықтарын қамтамасыз етуді және қорғауды мақсат ететін маңызды бағыттардың бірі деп есептесін.
Осыған байланысты:
1. Мемлекеттік айыптауға қолдау көрсету жөніндегі жұмыстарды қылмысқа қарсы күрестің пәрменді құралдарының бірі ретінде ұдайы жетілдіріп отырсын.
ҚР Бас Прокурорының 2012.29.06. № 79 бұйрығымен (2012 жылдың 1 шілдесінен бастап қолданысқа енгізілді) (бұр.ред.қара); 2013.08.10. № 102 бұйрығымен (бұр.ред.қара) 2-тармақ өзгертілді
2. Жариялы және жеке-жариялы айыптаудағы барлық қылмыстық істерді сот талқылауына, сондай-ақ ҚР ҚІЖК 33-бабының 2-бөлігіне сәйкес қозғалған істерді қарауға прокурорлардың қатысуын қамтамасыз етсін.
Қалалық, аудандық прокуратуралардың қызметкерлері әдетте, бірінші сатыдағы сот отырысына қатысады.
Бас Прокурор және оның орынбасарлары бекіткен айыптау қорытындылары бар қылмыстық істер бойынша мемлекеттік айыптаушылар Бас прокуратура басшылығының келісімі бойынша тағайындалады.