Вступительное слово Председателя Сената Парламента РК на парламентских слушаниях на тему: «Повышение конкурентоспособности отечественного аграрного сектора в условиях ЕАЭС и ВТО - законодательное регулирование и практическая реализация»
(г.Астана, 29 апреля 2016 года)
Құрметті Парламент депутаттары және шақырылған лауазым иелері!
Бүгінгі парламенттік тыңдаудың тақырыбы өте өзекті, себебі аграрлық сектордың тиімділігін арттырмай, мемлекеттің тұрақты дамуын және оның азық-түлік қауіпсіздігін қамтамасыз ету мүмкін емес. Бұл қоғамның әлеуметтік әл-ауқатының негізі болып табылады. Әлемнің барлық дамыған елдері ауыл шаруашылығына айрықша назар аударуы тегін емес. Олар өз нарықтарын қорғау үшін дәл осы ауылшаруашылық өнімдері саласында мейлінше қатаң протекционистік шараларды қолданып отыр.
Біздің елде халқымыздың жартысына жуығы ауыл шаруашылығында еңбек етуде. Қазақстан халқының қырық екі пайызы ауылдық жерлерде тұрады; жұмыс орындарының едәуір бөлігі ауылшаруашылық өнімдерін сату және оларды өңдеу саласына тиесілі, аграрлық сектор өнеркәсіптік тауарлар мен көрсетілетін қызметтер нарығының ірі тұтынушысы болып табылады.
Қазақстанның 2050 жылға дейінгі стратегиялық даму жоспарында Қазақстан Республикасының Президенті - Елбасы Нұрсұлтан Әбішұлы Назарбаев әлемдік азық-түлік нарығындағы көшбасшылар қатарына шығу үшін ауыл шаруашылығын ауқымды түрде жаңғырту міндетін қойды.
Қазақстанның зор әлеуетінің арқасында осы міндетті іске асыруға толық мүмкіндік бар. Біз 200 млн. гектардан астам аумақты құрайтын әлемдегі ең ірі ауылшаруашылық алқаптарының иесіміз, қолайлы инвестициялық ахуал тудыратын заңнамалық актілер де қабылданған, ауылшаруашылық өнімдерін өндірушілерді қолдайтын мемлекеттік бағдарламалар жұмыс істеуде. Азық-түлік тауарларына әлемдік сұраныстың артуы аграрлық сектордың дамуына қарқын беру үстінде, Біріккен Ұлттар Ұйымының болжамы бойынша мұндай сұраныс 2050 жылға қарай 70 пайызға ұлғаюы тиіс.