«Теміржол көлігімен жүктерді тасымалдау қағидаларын бекіту туралы» Қазақстан Республикасы Индустрия және инфрақұрылымдық даму министрінің 2019 жылғы 2 тамыздағы бұйрығына өзгерістер мен толықтырулар енгізу туралы
Қазақстан Республикасы Индустрия және инфрақұрылымдық даму министрінің 2021 жылғы 5 мамырдағы № 220 бұйрығы
БҰЙЫРАМЫН:
1. «Теміржол көлігімен жүктерді тасымалдау қағидаларын бекіту туралы» Қазақстан Республикасы Индустрия және инфрақұрылымдық даму министрінің 2019 жылғы 2 тамыздағы № 612 бұйрығына (Нормативтік құқықтық актілерді мемлекеттік тіркеу тізілімінде № 19188 болып жарияланған) мынадай өзгерістер мен толықтырулар енгізілсін:
көрсетілген бұйрықпен бекітілген Теміржол көлігімен жүктерді тасымалдау қағидаларында:
18-1 тармақ мынадай редакцияда жазылсын:
«18-1. Жүктерді тасымалдау туралы есепке алуды жүргізу және есептілікті қалыптастыру мақсатында осы Қағидаларда көзделген барлық бастапқы есепке алу, есеп беру құжаттары мен кітаптары, сондай-ақ тасымалдаушы белгілеген құжаттар нысандары электрондық түрде мамандандырылған автоматтандырылған жүйеде (бұдан әрі-АТЖ), оның ішінде Ұлттық инфрақұрылым операторының ақпараттық жүйелерімен интеграцияланған жүйеде жасалуы мүмкін.
Жалпы нысандағы актілер, вагондарды беру және алып кету ведомостары, қабылдап-тапсырушының жаднамалары, жинақтау карточкалары және осы Қағидаларда және тасымалдаушының тарифтік басшылығында (прейскурантында) белгіленген тасымалдауға байланысты алымдар мен өзге де төлемдерді өндіріп алуға арналған құжаттардың басқа да нысандары АТЖ пайдалана отырып, оның ішінде Ұлттық инфрақұрылым операторының ақпараттық жүйелерімен интеграцияланған электрондық түрде жасалуы мүмкін.