"Ұлттық бірыңғай тестілеуді ұйымдастыру және өткізу ережесін бекіту
туралы" Қазақстан Республикасы Білім және ғылым министрінің
2004 жылғы 16 наурыздағы № 213 бұйрығына өзгерістер мен толықтырулар
енгізу туралы Қазақстан Республикасы Білім және ғылым министрінің
2004 жылғы 29 желтоқсандағы № 1057 бұйрығы
БҰЙЫРАМЫН:
1. "Ұлттық бірыңғай тестілеуді ұйымдастыру және өткізу ережесін бекіту туралы" Қазақстан Республикасы Білім және ғылым министрінің 2004 жылғы 16 наурыздағы № 213 бұйрығына (Қазақстан Республикасы орталық және басқа да мемлекеттік органдардың нормативтік құқықтық актілерінің Бюллетенінде № 21-24, 926 бетте басылған, нормативтік құқықтық актілерді мемлекеттік тіркеу реестрінде № 2804 нөмірімен тіркелген 2004 жылғы 29 сәуірдегі Білім және ғылым министрі міндетін атқарушысының № 373 бұйрығымен өзгерістер мен толықтырулар енгізілген) мынадай өзгерістер мен толықтырулар енгізілсін:
көрсетілген бұйрықпен бекітілген ұлттық бірыңғай тестілеуді ұйымдастыру және өткізу ережесінде:
5-тармақта:
"Қазақстан Республикасы Әділет министрлігінде 2000 жылғы 18 сәуірде № 1114 нөмірімен тіркелген "Қазақстан Республикасының білім беретін мектептер оқушыларының 1999-2000 оқу жылын аяқтау және емтихандар өткізу туралы" Қазақстан Республикасы Білім және ғылым министрінің 2000 жылғы 15 ақпандағы № 124 бұйрығымен бекітілген Қазақстан Республикасының білім беру ұйымдарының оқушыларын ауыстыру, қорытынды аттестаттау және бітіру тәртібі туралы нұсқаулықпен (бұдан әрі - Нұсқаулық)" деген сөздер "Министрлік бекітетін "Білім алушылардың үлгерімін ағымдағы бақылау, аралық және мемлекеттік қорытынды аттестаттау өткізу ережесі" (бұдан әрі - Қорытынды аттестаттау ережесі)" деген сөздермен ауыстырылсын;
"жоғары оқу орындарының қызметкерлері" деген сөздер "білім беру ұйымдарының қызметкерлері" деген сөздермен ауыстырылсын;