Қазақстан Республикасы Әділет министрлігінің мемлекеттік мекемелерін - халыққа қызмет көрсету орталықтарын құру туралы
Қазақстан Республикасы Үкіметінің 2007 жылғы 5 қаңтардағы № 1 Қаулысы
(2011.18.07. берілген өзгерістер мен толықтыруларымен)
Осы редакция 2011 жылғы 1 қарашада енгізілген өзгерістеріне дейін қолданылды
Мемлекет басшысының «Қазақстан экономикалық, әлеуметтік және саяси жедел жаңару жолында» атты 2005 жылғы 18 ақпандағы Қазақстан халқына Жолдауын іске асыру мақсатында Қазақстан Республикасының Үкіметі қаулы етедi:
1. Осы қаулыға 1-қосымшаға сәйкес Қазақстан Республикасы Әділет министрлігінің мемлекеттік мекемелері - халыққа қызмет көрсету орталықтары (бұдан әрі - мемлекеттік мекемелер) құрылсын.
2. Мемлекеттік мекемелер қызметінің негізгі мәні осы қаулыға 2-қосымшаға сәйкес «жалғыз терезе» қағидаты бойынша өтініштерді қабылдау және ресімделген құжаттарды беру жөнінде мемлекеттік қызмет көрсету болып белгіленсін.
ҚР Үкіметінің 2009.04.12. № 2014 Қаулысымен 2-1-тармақпен толықтырылды
2-1. Мемлекеттік органдар «жалғыз терезе» қағидаты бойынша көрсетілетін мемлекеттік қызмет түрлері тізбесінің 2-тармағын ескере отырып, өзінің құзыретіне кіретін әрбір мемлекеттік қызмет бойынша бөлек мемлекеттік қызметтер көрсету стандарттарын әзірлеуді және Үкіметке бекітуге енгізуді қамтамасыз етсін.
ҚР Үкіметінің 2009.04.12. № 2014 Қаулысымен 2-2-тармақпен толықтырылды
2-2. Мүдделі мемлекеттік және жергілікті атқарушы органдар осы қаулыдан туындайтын қажетті шараларды қабылдасын.
3. Мемлекеттік мекемелерді қаржыландыру республикалық бюджетте Қазақстан Республикасы Әділет министрлігіне көзделген қаражат есебінен және шегінде жүзеге асырылады деп белгіленсін.
4. Қазақстан Республикасы Әділет министрлігі заңнамада белгіленген тәртіппен:
1) мемлекеттік мекемелердің жарғыларын бекітуді және әділет органдарында мемлекеттік тіркелуін қамтамасыз етсін;
2) осы қаулыны іске асыру жөніндегі өзге де шараларды қабылдасын.
5. Қоса беріліп отырған Қазақстан Республикасы Үкіметінің кейбір шешімдеріне енгізілетін толықтырулар мен өзгерістер бекітілсін.
