Қазақстан Республикасы Президентінің
Жарлығы
«А» корпусының мемлекеттік әкімшілік лауазымдарына қойылатын арнайы біліктілік талаптарын бекіту туралы
(2025.28.04. берілген өзгерістер мен толықтырулармен)
ҚР Президентінің 2021.18.01. № 495 Жарлығымен тақырыбы жаңа редакцияда (бұр.ред.қара)
ҚАУЛЫ ЕТЕМІН:
ҚР Президентінің 2021.18.01. № 495 Жарлығымен 1-тармақ жаңа редакцияда (бұр.ред.қара)
1. Қоса беріліп отырған «А» корпусының мемлекеттік әкімшілік лауазымдарына қойылатын арнайы біліктілік талаптары бекітілсін.
2. Осы Жарлыққа қосымшаға сәйкес Қазақстан Республикасы Президентінің кейбір жарлықтарының күші жойылды деп танылсын.
3. Осы Жарлық 2016 жылғы 1 қаңтардан бастап қолданысқа енгізіледі және ресми жариялануға тиіс.
| Қазақстан Республикасының Президенті | Н. НАЗАРБАЕВ |
Астана, Ақорда, 2015 жылғы желтоқсанның 29-ы.
№ 151
Қазақстан Республикасы Президентінің
2015 жылғы 29 желтоқсандағы
№ 151 Жарлығымен
БЕКІТІЛГЕН
«А» корпусының мемлекеттік әкімшілік лауазымдарына қойылатын арнайы
біліктілік талаптары
ҚР Президентінің 2021.18.01. № 495 Жарлығымен тараудың тақырыбы жаңа редакцияда (бұр.ред.қара)
1-тарау. Жалпы ережелер
1. «А» корпусының мемлекеттік әкімшілік лауазымдарына қойылатын осы арнайы біліктілік талаптары (бұдан әрі - Арнайы біліктілік талаптары) «Қазақстан Республикасының мемлекеттік қызметі туралы» 2015 жылғы 23 қарашадағы Қазақстан Республикасы Заңының 17-бабының 3-тармағына сәйкес әзірленді және «А» корпусының мемлекеттік әкімшілік лауазымдарына орналасуға үміткер азаматтарға қойылады.
ҚР Президентінің 2024.31.07. № 612 Жарлығымен 2-тармақ жаңа редакцияда (2024 ж. 12 тамыздан бастап қолданысқа енгізілді) (бұр.ред.қара)
2. Арнаулы біліктілік талаптары:
1) білімі бойынша талаптарды;
2) жұмыс өтілі бойынша талаптарды;
3) кәсіптік білімі, стратегиялық және бағдарламалық құжаттарды білуі бойынша талаптарды;
4) құзыреттер бойынша талаптарды қамтиды.
