Мемлекеттік сатып алу туралы Қазақстан Республикасының
2002 ж. 16 мамырдағы N 321-II Заңы
Осы редакция 2004 жылғы 5 шілдедегі N 569-II ҚР Заңымен енгізілген өзгерістеріне дейін қолданылды
Осы Заң мемлекеттiк органдардың, мемлекеттiк мекемелердiң, мемлекеттiк кәсiпорындардың, сондай-ақ акцияларының бақылау пакетi мемлекетке тиесiлi акционерлiк қоғамдардың және олармен аффилиирленген заңды тұлғалардың өз билiгiндегi ақшаны тиiмдi пайдалану мақсатында өнiм берушiлерден тауарларды, жұмыстар мен көрсетiлетiн қызметтердi сатып алуды жүзеге асыру процесiнде туындайтын қатынастарды реттейдi.
1-тарау. Жалпы ережелер
1-бап. Осы Заңда пайдаланылатын негiзгi ұғымдар
Осы Заңда мынадай негiзгi ұғымдар пайдаланылады:
1) тапсырыс берушiнiң аффилиирленген тұлғасы - акциясының (қатысу үлесiнiң) елу және одан да көбiрек процентi осы тапсырыс берушiге тиесiлi (басқаруға берiлген) заңды тұлға;
2) ықтимал өнiм берушiнiң аффилиирленген тұлғасы - осы ықтимал өнiм берушi қабылдайтын шешiмдi анықтауға және (немесе) шешiмге, оның iшiнде шарттың немесе өзге де мәмiленiң күшiне қарай ықпал етуге тiкелей және (немесе) жанама құқығы бар кез келген жеке немесе заңды тұлға, сондай-ақ өзi жөнiнде сол ықтимал өнiм берушiнiң осындай құқығы бар кез келген жеке немесе заңды тұлға;
3) мемлекеттiк сатып алу - мемлекеттiк органдардың, мемлекеттiк мекемелердiң, мемлекеттiк кәсiпорындардың және акцияларының бақылау пакетi мемлекетке тиесiлi акционерлiк қоғамдардың, сондай-ақ олармен аффилиирленген заңды тұлғалардың өз билiгiндегi ақшаның есебiнен тауарларды, жұмыстар мен көрсетiлетiн қызметтердi сатып алуы;
