«Қауіпті қалдықтарды тасымалдау, соның ішінде тиеу-түсіру жұмыстарын орындау
ережесін бекіту туралы» Қазақстан Республикасы Көлік және коммуникация
министрінің 2006 жылғы 17 ақпандағы № 48 Бұйрығы
ҚР Көлік және коммуникация министрінің м.а. 2008 жылғы 20 маусымдағы № 298 Бұйрығымен күші жойылды
«Қоршаған ортаны қорғау туралы» Қазақстан Республикасы Заңының 62-4-бабының 2-тармағына сәйкес БҰЙЫРАМЫН:
1. Қоса беріліп отырған Қауіпті қалдықтарды тасымалдау, соның ішінде тиеу-түсіру жұмыстарын орындау ережесі бекітілсін.
2. Қазақстан Республикасы Көлік және коммуникация министрлігінің Көліктік бақылау комитеті (Қ.С. Мұстафин) осы бұйрықты мемлекеттік тіркеу үшін Қазақстан Республикасы Әділет министрлігіне ұсынуды қамтамасыз етсін.
3. Осы бұйрықтың орындалуын бақылау Қазақстан Республикасы Көлік және коммуникация вице-министрі Е.Ж.Қошановқа жүктелсін.
4. Осы бұйрық алғаш ресми жарияланған күнінен кейін он күн өткен соң қолданысқа енгізіледі.
«КЕЛІСІЛГЕН»
Қазақстан Республикасы
Денсаулық сақтау министрі
2006 жылғы 31 қаңтар
«КЕЛІСІЛГЕН»
Қазақстан Республикасы
Қоршаған ортаны қорғау министрі
2006 жылғы 17 ақпан
Қазақстан Республикасы
Көлік және коммуникация министрінің
2006 жылғы 17 ақпандағы
№ 48 бұйрығымен бекітілген
Қауіпті қалдықтарды тасымалдау, соның ішінде
тиеу-түсіру жұмыстарын орындау ережесі
1. Жалпы ережелер
1. Осы Қауіпті қалдықтарды тасымалдау, соның ішінде тиеу-түсіру жұмыстарын орындау ережесі (бұдан әрі - Ереже) «Қоршаған ортаны қорғау туралы» Қазақстан Республикасының Заңына сәйкес әзірленді.
2. Ереже Қазақстан Республикасының аумағында қауіпті қалдықтарды (радиоактивтіден басқа) тасымалдауға, соның ішінде тиеу-түсіру жұмыстарын орындауға байланысты жеке және заңды тұлғалардың қарым-қатынасын реттейді.
Қауіпті қалдықтарды трансшекаралық тасымалдау Қазақстан Республикасы ратификациялаған халықаралық шарттардың талаптарына сәйкес жүзеге асырылады.
