Тараз қалалық мәслихатының Регламентін бекіту туралы
Жамбыл облысы Тараз қалалық мәслихатының 2023 жылғы 28 сәуірдегі № 2-3 шешімі
Қазақстан Республикасының «Қазақстан Республикасындағы жергілікті мемлекеттік басқару және өзін-өзі басқару туралы» Заңының 8-бабының 3-тармағының 5) тармақшасына және Қазақстан Республикасы Президентінің «Мәслихаттың үлгі регламентін бекіту туралы» 2013 жылғы 3 желтоқсандағы № 704 Жарлығына сәйкес, Тараз қалалық мәслихаты ШЕШТІ:
1. Тараз қалалық мәслихатының регламенті осы шешімнің қосымшасына сәйкес бекiтiлсiн.
2. Тараз қалалық мәслихатының «Тараз қалалық мәслихатының Регламентін бекіту туралы» 2022 жылғы 30 наурыздағы № 13-6 шешімі жойылсын.
| Тараз қалалық мәслихатының төрағасы | К. Олжабай |
Тараз қалалық мәслихатының
2023 жылғы 28 сәуірдегі
№ 2-3 шешіміне қосымша
Тараз қалалық мәслихаттың
регламенті
1-тарау. Жалпы ережелер
1. Осы Мәслихаттың регламенті (бұдан әрі – Регламент) «Қазақстан Республикасындағы жергілікті мемлекеттік басқару және өзін-өзі басқару туралы» Қазақстан Республикасы Заңының (бұдан әрі – Заң) 9-бабына сәйкес әзірленді және мәслихаттың сессияларын, оның органдарының отырыстарын өткізу, оларға мәслихаттың органдарын сайлау және құру мәселелерін енгізу және қарау, олардың қызметі туралы есептерді, халық алдында мәслихаттың атқарған жұмысы және оның тұрақты комиссияларының қызметі туралы есептерді тыңдау, депутаттардың сауалдарын қарау тәртібін, мәслихаттағы депутаттық бірлестіктердің өкілеттіктерін, қызметін ұйымдастыруды, сондай-ақ дауыс беру, аппарат жұмысының тәртібін және басқа да рәсімдік және ұйымдастырушылық мәселелерді белгілейді.
