Түркістан облысы әкімі аппаратының Регламентін бекіту туралы
Түркістан облысы әкiмдiгiнiң 2025 жылғы 29 сәуірдегі № 86 Қаулысы
(2026.28.03. берілген өзгерістермен)
Қазақстан Республикасының Әкімшілік рәсімдік-процестік кодексіне, Қазақстан Республикасының «Қазақстан Республикасындағы жергілікті мемлекеттік басқару және өзін-өзі басқару туралы» Заңына және Қазақстан Республикасы Ұлттық экономика министрінің 2023 жылғы 26 маусымдағы № 123 «Облыс (республикалық маңызы бар қала, астана) және аудан (облыстық маңызы бар қала) әкімдіктерінің үлгілік регламенттерін бекіту туралы» бұйрығына сәйкес, Түркістан облысының әкімдігі ҚАУЛЫ ЕТЕДІ:
1. Түркістан облысы әкімі аппаратының Регламенті осы қаулының қосымшасына сәйкес бекітілсін.
2. Облыс әкімінің бірінші орынбасары, облыс әкімінің орынбасарлары, облыс әкімі аппаратының басшысы, аудан және облыстық маңызы бар қала әкімдері, облыстық бюджеттен қаржыландырылатын атқарушы органдардың басшылары, облыс әкімі аппаратының қызметкерлері заңнамада белгіленген тәртіппен осы Регламентті бұлжытпай орындауды қамтамасыз етсін.
3. Осы қаулының орындалуын бақылау облыс әкімі аппаратының басшысына жүктелсін.
4. Осы қаулы оның алғашқы ресми жарияланған күнінен кейін күнтізбелік он күн өткен соң қолданысқа енгізіледі.
Түркістан облысы әкімдігінің
29 сәуірдегі 2025 жылғы
№ 86 қаулысына
қосымша
Түркістан облысы әкімі аппаратының регламенті
1. Жалпы ережелер
1. Осы Түркістан облысы әкімі аппаратының регламенті (бұдан әрі - Регламент) жүктелген міндеттер мен функцияларды атқару процесінде Түркістан облысы әкімі аппараты (бұдан әрі - Аппарат) мен облыстық бюджеттен қаржыландырылатын атқарушы органдары, сондай-ақ аудандар мен облыстық маңызы бар қалалардың әкімдіктерінің өзіне жүктелген міндеттері мен функцияларын орындау процесіне қатысты бөлігіндегі қызметінің ішкі тәртібін белгілейді.
