Гидрологиялық болжамдарды беру қағидаларын, мұндай ақпараттың құрамы мен мазмұнына қойылатын талаптарды, оны жариялау және мүдделі тұлғаларға беру тәртібін бекіту туралы
Қазақстан Республикасы Экология және табиғи ресурстар министрінің 2024 жылғы 31 қазандағы № 266-Ө бұйрығы
Қазақстан Республикасы Экология кодексінің 166-бабының 3-тармағына сәйкес БҰЙЫРАМЫН:
1. Қоса беріліп отырған Гидрологиялық болжамдарды беру қағидалары, мұндай ақпараттың құрамы мен мазмұнына қойылатын талаптар, оны жариялау және мүдделі тұлғаларға беру тәртібі бекітілсін.
2. Осы бұйрықтың орындалуын бақылау жетекшілік ететін Қазақстан Республикасының Экология және табиғи ресурстар вице-министріне жүктелсін.
3. Осы бұйрық қол қойылған күнінен бастап күшіне енеді.
Қазақстан Республикасы
Экология және табиғи ресурстар
министрінің
2024 жылғы 31 қазандағы
№ 266 бұйрығымен
бекітілген
Гидрологиялық болжамдарды беру қағидалары, мұндай ақпараттың құрамы
мен мазмұнына қойылатын талаптар, оны жариялау және мүдделі тұлғаларға беру
тәртібі
1-тарау. Жалпы ереже
1. Осы Гидрологиялық болжамдарды беру қағидалары, мұндай ақпараттың құрамы мен мазмұнына қойылатын талаптар, оны жариялау және мүдделі тұлғаларға беру тәртібі (бұдан әрі - Қағидалар) Қазақстан Республикасының Экология кодексінің 166 және 169-баптарына сәйкес әзірленді және онда Ұлттық гидрометеорологиялық қызметтің (бұдан әрі - ҰГМҚ) гидрологиялық болжамдарды, қауіпті және дүлей гидрологиялық құбылыстардың туындау мүмкіндігі мен фактісі туралы алдын ала ескертулерді ұсыну тәртібін белгілейді.
2. Осы Қағидаларда мынадай негізгі ұғымдар мен терминдер қолданылады:
1) гидрологиялық болжам - белгілі бір кезең мен орын үшін гидрологиялық құбылыстың болашақ сипаттамаларын алдын ала бағалау;
2) алдын ала болжамның (ескертудің) - болжамды шығару (ескертуді) мен күтілетін болжамды құбылыстың пайда болуы арасындағы уақыт интервалы.
