ҚР Ішкі істер министрінің 2016.08.02. № 113 бұйрығымен күші жойылды
Қазақстан Республикасы
Ішкі істер министрінің
2011 жылғы 27 мамырдағы
№ 246 бұйрығына
1-қосымша
Ішкі істер органдарына қызметке үміткерлерді іріктеу және зерделеу жөніндегі
нұсқаулық
(2015.29.01. берілген өзгерістермен)
1. Ішкі істер органдарына (бұдан әрі - ІІО) қызметке (оқуға) қабылданатын үміткерлерді зерделеуді және іріктеуді ІІО-ның кадр аппараты жүзеге асырады.
2. ІІО-ға қызметке іріктеу кезінде үміткерлердің іскерлік, жеке және моральдық қасиеттерінің қызметтік жұмыстың нақты учаскелерінде ІІО қызметкерлеріне қойылатын талаптарға неғұрлым сәйкес келуін анықтау іріктеудің негізгі мақсаты болып табылатынын ескеру қажет.
3. Үміткерлерді іріктеу жөніндегі жұмысты ұйымдастыру ІІО кадр аппараттарына жүктеледі.
ҚР Ішкі істер министрінің 2013.02.04. № 220 бұйрығымен (бұр.ред.қара); 2013.27.08. № 521 бұйрығымен (бұр.ред.қара) 4-тармақ жаңа редакцияда
4. Ішкі істер органдарының қатардағы және кіші басшы құрам лауазымдарына жиырма бес жастан аспаған, орта және аға басшы құрам лауазымдарына - отыз бес жастан аспаған, тиісті білімі бар және мерзімді әскери қызмет өткерген азаматтар немесе әскери-оқыту резервін даярлау бойынша Қорғаныс министрлігінің мамандандырылған ұйымдарында әскери даярлықтан өткен, сондай-ақ Қазақстан Республикасының заңнамасына сәйкес мерзімді әскери қызметке шақырудан босатылған немесе кейінге қалдырылған азаматтар қабылданады.
Ішкі істер органдарына қызметке ішкі істер министрінің шешімімен орта және аға басшы құрам лауазымдарына жоғары кәсіптік даярлыққа ие немесе белгіленген мамандықтары бойынша мол тәжірибесі бар жасы отыз бес жастан асқан адамдар қабылданады.
ҚР Ішкі істер министрінің 2013.27.08. № 521 бұйрығымен 5-тармақ жаңа редакцияда (бұр.ред.қара)
