Әскери қызметшілерді тұрғын үймен қамтамасыз ету қағидаларын бекіту туралы
Қазақстан Республикасы Үкіметінің 2012 жылғы 28 тамыздағы № 1091 Қаулысы
(2017.30.10. берілген өзгерістермен)
ҚР Үкіметінің 2018 жылғы 12 ақпандағы № 49 Қаулысымен күші жойылды
«Тұрғын үй қатынастары туралы» Қазақстан Республикасының 1997 жылғы 16 сәуірдегі Заңының 99-бабына, «Әскери қызмет және әскери қызметшілердің мәртебесі туралы» Қазақстан Республикасының 2012 жылғы 16 ақпандағы Заңының 45, 55-баптарына сәйкес Қазақстан Республикасының Үкіметі ҚАУЛЫ ЕТЕДІ:
1. Қоса беріліп отырған Әскери қызметшілерді тұрғын үймен қамтамасыз ету қағидалары бекітілсін.
2. Мыналардың:
1) «Әскери қызметшілерге кооперативтік тұрғын - жай, жеке тұрғын үй салуға өтемсіз қаржы көмегін көрсету тәртібі және осы мақсатқа бөлінген ақшалай қаржының нысаналы түрде пайдаланылуын бақылау туралы нұсқауды бекіту туралы» Қазақстан Республикасы Министрлер Кабинетінің 1993 жылғы 30 қарашадағы № 1207 қаулысының;
2) «Әскери қызметшілерге (мерзімді қызметтегі әскери қызметшілерден және әскери (арнаулы) оқу орындарының курсанттарын қоспағанда) жабық және оқшауланған әскери қалашықтардағы, шекара заставаларындағы және комендатуралардағы орталықтандырылған жылудан басқа, коммуналдық қызметтер шығыстарын төлеу үшін ақшалай өтемақы төлеу тәртібі туралы ережені бекіту туралы» Қазақстан Республикасы Үкіметінің 2002 жылғы 29 мамырдағы № 593 қаулысының (Қазақстан Республикасының ПҮАЖ-ы 2002 ж., № 16, 170-құжат);
3) «Қазақстан Республикасы Үкіметінің кейбір шешімдеріне толықтырулар мен өзгерістер енгізу туралы» Қазақстан Республикасы Үкіметінің 2004 жылғы 31 тамыздағы № 912 қаулысымен бекітілген Қазақстан Республикасы Үкіметінің кейбір шешімдеріне енгізілетін толықтырулар мен өзгерістердің 1-тармағының (Қазақстан Республикасының ПҮАЖ-ы 2004 ж., № 31, 430-құжат) күші жойылды деп танылсын.
