Қағида 2026 ж. 1 қаңтардан бастап қолданысқа енгізілді
Қазақстан Республикасы
Қаржы министрінің
2025 жылғы 28 мамырдағы
№ 258 бұйрығына
2-қосымша
Бюджеттік есепке алуды жүргізу
қағидалары
Мазмұны
1-тарау. Жалпы ережелер
2-тарау. Есепке алу құжаттары
3-тарау. Бюджеттің атқарылуын есепке алу тіркелімдері
4-тарау. Бастапқы құжаттарды, есепке алу тіркелімдерін және бюджеттердің атқарылуы жөніндегі есептерді сақтау
5-тарау. Бюджеттік есепке алу шоттарының жоспары
6-тарау. Бюджеттің атқарылуы жөніндегі операцияларды есепке алу тәртібі
Қосымшалар
1-тарау. Жалпы ережелер
1. Осы Бюджеттік есепке алуды жүргізу қағидалары (бұдан әрі - Қағидалар) Қазақстан Республикасының Бюджет кодексінің (бұдан әрі - Бюджет кодексі) 117-бабының 3-тармағына сәйкес әзірленді және республикалық және жергілікті бюджеттердің атқарылуын бюджеттік есепке алуды жүргізудің тәртібін анықтайды.
Бюджетті атқару жөніндегі уәкілетті органдар, мемлекеттік қазынашылық және аудандық маңызы бар қалалар, ауылдар, кенттер, ауылдық округтер әкімдерінің аппараттары (бұдан әрі - бюджетті атқару жөніндегі уәкілетті органдар) осы Қағидаларға сәйкес бюджеттік есепке алуды жүргізуді жүзеге асырады.
Бюджеттік есепке алу - Қазақстан Республикасының бюджет заңнамасымен реттелген, кассалық негізде бірыңғай қазынашылық шотынан және мемлекеттік мекемелердің шоттарынан операциялар туралы ақшалай мәндегі ақпаратты жинаудың, тіркеудің және қорытудың реттелген жүйесі.
Бірыңғай қазынашылық шоты қолма-қол ақшаны бақылау шоттарындағы ақша қалдықтарын қамтиды.
Бюджеттік есепке алу шоттар жоспарына сәйкес шоттарда операциялар қосарланған жазба тәсілімен көрсетілетін, кассалық негізде жүзеге асырылатын бюджеттердің атқарылуын есепке алуды білдіреді. Бюджеттік есепке алу Қазақстан Республикасының ұлттық валютасында жүргізіледі.
