Транспланттау жөніндегі үйлестіру орталығы туралы ережені бекіту туралы
Қазақстан Республикасы Денсаулық сақтау министрінің 2020 жылғы 19 қазандағы № 664 бұйрығы
«Халық денсаулығы және денсаулық сақтау жүйесі туралы» Қазақстан Республикасының 2020 жылғы 7 шілдедегі Кодексі 211-бабының 1- тармағына сәйкес БҰЙЫРАМЫН:
1. Осы бұйрыққа қосымшаға сәйкес Транспланттау жөніндегі үйлестіру орталығы туралы ереже бекітілсін.
2. Қазақстан Республикасының Денсаулық сақтау министрілігінің Медициналық көмекті ұйымдастыру департаменті осы бұйрықты қабылдаған күннен бастап он жұмыс күні ішінде орыс және қазақ тілдерде Қазақстан Республикасының Денсаулық сақтау министрілігінің интернет-ресурсына орналыстаруды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Денсаулық сақтау вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
Қазақстан Республикасы
Денсаулық сақтау министрінің
2020 жылғы 19 қазандағы
№ 664 бұйрығына
қосымша
Транспланттау жөніндегі үйлестіру орталығы туралы
ереже
1- тарау. Жалпы ережелер
1. Осы Транспланттау жөніндегі үйлестіру орталығы туралы ереже (бұдан әрі - Ереже) «Халық денсаулығы және денсаулық сақтау жүйесі туралы» Қазақстан Республикасының 2020 жылғы 7 шілдедегі Кодексі (бұдан әрі - Кодекс) 211-бабының 1-тармағына сәйкес әзірленді және Транспланттау жөніндегі үйлестіру орталығының мәртебесі мен өкілеттігін айқындайды.
2. Транспланттау жөніндегі үйлестіру орталығы (бұдан әрі - Орталық) - ағзаларды (ағзаның бөлігін) және (немесе) тіндерді (тіннің бөлігін) транспланттауды үйлестіру және сүйемелдеу мәселелерімен айналысатын денсаулық сақтау ұйымы.
