Бизнестің цифрлық картасын әзірлеу жөніндегі әдістемені бекіту туралы
Қазақстан Республикасы Ұлттық экономика министрінің м.а. 2025 жылғы 27 маусымдағы № 60 бұйрығы
Қазақстан Республикасы Кәсіпкерлік кодексінің 99-бабының 9-1) тармақшасына сәйкес БҰЙЫРАМЫН:
1. Қоса беріліп отырған Бизнестің цифрлық картасын әзірлеу жөніндегі әдістеме бекітілсін.
2. Қазақстан Республикасы Ұлттық экономика министрлігінің Кәсіпкерлікті дамыту саясаты департаменті Қазақстан Республикасының заңнамасында белгіленген тәртіппен осы бұйрықтың Қазақстан Республикасының Әділет министрлігінде мемлекеттік тіркелуін және алғашқы ресми жарияланған күнінен кейін оны Қазақстан Республикасы Ұлттық экономика министрлігінің интернет-ресурсында орналастыруды қамтамасыз етсін.
3. Осы бұйрықтың орындалуын бақылау жетекшілік ететін Қазақстан Республикасының Ұлттық экономика вице-министріне жүктелсін.
4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.
| Қазақстан Республикасы Ұлттық экономика министрінің міндетін атқарушы | А. Амрин |
Қазақстан Республикасы
Ұлттық экономика министрінің
міндетін атқарушы
2025 жылғы 27 маусымдағы
№ 60 бұйрығымен бекітілген
Бизнестің цифрлық картасын әзірлеу жөніндегі
әдістеме
1-тарау. Жалпы ережелер
1. Осы Бизнестің цифрлық картасын әзірлеу жөніндегі әдістеме (бұдан әрі - Әдістеме) Қазақстан Республикасы Кәсіпкерлік кодексінің (бұдан әрі - Кодекс) 99-бабы 9-1) тармақшасына сәйкес әзірленді және Бизнестің цифрлық картасын әзірлеу үшін қолданылады.
2. Әдістемеде пайдаланылатын негізгі ұғымдар:
1) Бизнестің цифрлық картасы - кәсіпкерлік субъектілерінің қызметті жүзеге асыруына байланысты деректер мен процестерді біріктіретін кешенді, интеграцияланған ақпараттық-талдамалық жоба;
2) жеке кәсіпкерлікті мемлекеттік қолдау шараларының тізілімі - Кодексте регламенттелген қаржылық, мүліктік және қаржылық емес қолдау құралдарының тізбесі;
