Тәрбиенің тұжырымдамалық негіздерін бекіту туралы
Қазақстан Республикасы Білім және ғылым министрінің 2015 жылғы 22 сәуірдегі № 227 бұйрығы
(2016.19.04. берілген өзгерістермен)
ҚР Білім және ғылым министрінің 2019 жылғы 15 сәуірдегі № 145 бұйрығымен күші жойылды
Қазақстан Республикасы Білім және ғылым министрлігінің 2015 жылға арналған Жұмыс жоспарына сәйкес БҰЙЫРАМЫН:
1. Қоса беріліп отырған Тәрбиенің тұжырымдамалық негіздері бекітілсін.
2. Мектепке дейінгі және орта білім, ақпараттық технологиялар департаменті:
1) 2015 жылғы 30 сәуірге дейінгі мерзімде Тәрбиенің тұжырымдамалық негіздерін іске асыру жөніндегі іс-шаралар жоспарын әзірлесін;
2) осы бұйрықты облыстардың, Астана және Алматы қалаларының білім басқармаларының назарына жеткізуді қамтамасыз етсін.
3. Осы бұйрықтың орындалуын бақылау Қазақстан Республикасының Білім және ғылым вице-министрі Е.Н. Иманғалиевқа жүктелсін.
4. Осы бұйрық қол қойылған күнінен бастап күшіне енеді.
Қазақстан Республикасы
Білім және ғылым министрінің
2015 жылғы 22 сәуірдегі
№ 227 бұйрығымен
бекітілген
ТӘРБИЕНІҢ ТҰЖЫРЫМДАМАЛЫҚ НЕГІЗДЕРІ
Құрылымы
Кіріспе
Тәрбиенің тұжырымдамалық негіздерінің мақсаты, міндеттері, нысаны және іске асыру механизмдері
Нормативтік-құқықтық қамтамасыз ету
Тәрбиенің мақсаты мен міндеттері
Тәрбие процесін ұйымдастырудың әдіснамалық негіздері
Тәрбие жұмысының басым бағыттары
Тәрбиенің тұжырымдамалық негіздерін іске асыру шарттары
Тәрбиенің тұжырымдамалық негіздерін іске асыруда күтілетін нәтижелер
Глоссарий
Кіріспе
Тәрбиенің тұжырымдамалық негіздері білім беру саласындағы мемлекеттік саясатты жүзеге асыру аясында қазақстандық қоғамдағы заманауи әлеуметтік мәдени трансформация ескеріле отырып әзірленді.
