Авиациялық персонал куәлігі берілетін адамдарға қойылатын біліктілік талаптарды бекіту туралы
Қазақстан Республикасы Көлік және коммуникация министрлігінің 2011 жылғы 13 маусымдағы № 362 бұйрығы
(2013.20.11. берілген өзгерістер мен толықтырулармен)
Осы редакция 2017 жылғы 14 шілдеде енгізілген өзгерістеріне дейін қолданылды
«Қазақстан Республикасының әуе кеңiстiгiн пайдалану және авиация қызметі туралы» Қазақстан Республикасы Заңының 54-бабы 5-тармағына сәйкес бұйырамын:
1. Қоса беріліп отырған Авиациялық персонал куәлігі берілетін адамдарға қойылатын біліктілік талаптары бекітілсін.
2. Қазақстан Республикасы Көлік және коммуникация министрлігінің Азаматтық авиация комитеті (Р.Ө. Әдимолда) белгіленген тәртіппен осы бұйрықты Қазақстан Республикасы Әділет министрлігіне мемлекеттік тіркеу үшін ұсынуды қамтамасыз етсін.
3. Осы бұйрықтың орындалуын бақылау Қазақстан Республикасы Көлік және коммуникация вице-министрі А.Ғ. Бектұровқа жүктелсін.
4. Осы бұйрық алғашқы ресми жарияланған күнінен кейін жиырма бір күн өткен соң қолданысқа енгізіледі.
Қазақстан Республикасы
Көлік және коммуникация министрінің
2011 жылғы 13 маусымдағы № 362 бұйрығым
бекітілген
Авиациялық персонал куәлігі берілетін адамдарға қойылатын
біліктілік талаптар
1. Жалпы ережелер
1. Осы Авиациялық персонал куәлігі берілетін адамдарға қойылатын біліктілік талаптары (бұдан әрі - Біліктілік талаптары) «Қазақстан Республикасының әуе кеңiстiгiн пайдалану және авиация қызметi туралы» Қазақстан Республикасы Заңына және Халықаралық азаматтық авиация туралы конвенцияға (Чикаго, 1944 жыл) сәйкес және Халықаралық азаматтық авиация ұйымының стандарттары мен ұсынылатын іс-тәжірибесін іске асыру мақсатында әзірленді. (1-қосымша «Авиациялық персоналға куәліктер беру»).
ҚР Көлік және коммуникация министрінің м.а. 2011.02.12. № 711 бұйрығымен 2-тармақ жаңа редакцияда (алғашқы ресми жарияланған күнінен кейін күнтізбелік жиырма күн өткен соң қолданысқа енгізілді) (бұр.ред.қара)
