Педагогикалық қайта даярлаудың білім беру бағдарламасын бекіту туралы
Қазақстан Республикасы Қорғаныс министрінің 2025 жылғы 8 қыркүйектегі № 1227 бұйрығы
«Әскери қызмет және әскери қызметшілердің мәртебесі туралы» Қазақстан Республикасының Заңы 50-бабы 2-тармағының 35) тармақшасына сәйкес БҰЙЫРАМЫН:
1. Қоса беріліп отырған Педагогикалық қайта даярлаудың білім беру бағдарламасы бекітілсін.
2. Осы бұйрықтың орындалуын бақылау Қазақстан Республикасы Қорғаныс министрінің тәрбие және идеологиялық жұмыс жөніндегі орынбасарына жүктелсін.
3. Осы бұйрық 2025 жылғы 16 қыркүйектен бастап қолданысқа енгізіледі және ресмия жариялануға тиіс.
4. Осы бұйрық мүдделі лауазымды адамдарға және құрылымдық бөлімшелерге жеткізілсін.
| Қазақстан Республикасы Қорғаныс министрі | Д. Косанов |
«КЕЛІСІЛДІ»
Қазақстан Республикасының
Оқу-ағарту министрлігі
Қазақстан Республикасы
Қорғаныс министрі
2025 жылғы 8 қыркүйектегі
№ 1227 бұйрыққа 1- қосымша
Педагогикалық қайта даярлаудың білім беру
бағдарламасы
1-тарау. Жалпы ережелер
«Бастапқы әскери және технологиялық даярлық» пәні саласында педагогтардың кәсіби құзыреті мен шеберлігін дамыту» педагогикалық кадр курсының білім беру бағдарламасы (бұдан әрі - Бағдарлама) орта білім беру ұйымында бастапқы әскери және технологиялық даярлық пәнінің оқытушыларын даярлау үшін арналған.
Бағдарлама офицер құрамы әскери қызметшілерінің (бастапқы жоғары білім және әскери қызмет тәжірибесі негізінде) орта білім беру ұйымында бастапқы әскери және технологиялық даярлық (бұдан әрі - БӘД) оқытушыларының білім беру сапасына қойылатын жаңа талаптарды ескеріп, орта білім беру мазмұнын жаңарту, білім беру процесін жобалау және іске асыру мәселелері бойынша біліктілік алуына бағытталған.
2-бөлім. Глоссарий
Білім беру жүйесіндегі инновациялық тәсіл - педагогикалық технологияны, оқыту әдістерінің, тәсілдері мен құралдарының жиынтығын жетілдіру процесі.
