Келісу комиссиясының Үлгілік ережесін және Жұмыс тәртібін бекіту туралы
Қазақстан Республикасы Қаржы министрінің 2022 жылғы 17 ақпандағы № 176 бұйрығы
ҚР Қаржы министірінің 2024 жылғы 31 шілдедегі № 501 бұйрығымен күші жойылды
«Мемлекеттік сатып алу туралы» Қазақстан Республикасы Заңының 16-бабының 11-5) тармақшасына сәйкес БҰЙЫРАМЫН:
1. Қоса беріліп отырған:
1) Келісу комиссиясының Үлгілік ережесі осы бұйрыққа 1-қосымшаға сәйкес;
2) Келісу комиссиясының Жұмыс тәртібі осы бұйрыққа 2-қосымшаға сәйкес бекітілсін.
2. Қазақстан Республикасы Қаржы министрлiгiнiң Мемлекеттік сатып алу және квазимемлекеттік секторының сатып алу заңнамасы департаментi (М.Б. Әділханов) осы бұйрықты Қазақстан Республикасы Қаржы министрлігінің интернет-ресурсында орналастыруды қамтамасыз етсін.
3. Осы бұйрық қол қойылған күннен бастап күшіне енеді.
Қазақстан Республикасы
Қаржы министрінің
2022 жылғы 17 ақпандағы
№ 176 бұйрығына 1-қосымша
Келісу комиссиясының Үлгілік ережесі
1 тарау. Жалпы ережелер
1. Келісу комиссиясының осы үлгілік ережесі «Мемлекеттік сатып алу туралы» Қазақстан Республикасы Заңының (бұдан әрі - Заң) 16-бабының 11-5) тармақшасына сәйкес әзірленді.
2. Келісу комиссиясы - Заңда айқындалған тәртіппен тапсырыс беруші құратын, мемлекеттік сатып алу туралы шарт жасасудан жалтару салдарынан мемлекеттік сатып алуға жосықсыз қатысушылардың тізіліміне енгізілген әлеуетті өнім берушілердің өтініштерін қарайтын тұрақты жұмыс істейтін алқалы орган.
3. Келісу комиссиясы өз қызметінде Қазақстан Республикасының Конституциясын, Қазақстан Республикасының заңдарын, Қазақстан Республикасының Президенті мен Үкіметінің актілерін, Қазақстан Республикасының өзге де нормативтік құқықтық актілерін, сондай-ақ осы Үлгілік ережені басшылыққа алады. Келісу комиссиясы өз жұмысын ашықтық, жариялылық, алқалылық және турашылдық қағидаттарында ұйымдастырады.
2-тарау. Келісу комиссиясының құрамы және оны қалыптастыру тәртібі
